Ema naok sasan loja sineza iha Elemloi

Ema deskoñesidu na’ok sasan iha Loja sineza nian iha Delta-Elemloi, Aldeia São Jose, Suku Comoro, Posto-Administrativu Dom-Aleixo, Munisípiu Dili.

Loja nain, Zhouliyun, informa, sasan sira ne’ebé mak ema deskoñesidu naok iha loja ne’e mak hanesan, telefone, pulsa, no osan US$ 1.000.

“Ema ne’e tama liu husi uma kakuluk, hodi loke kalen tama ba loja laran, foti sasan hanesan, telephone, pulsa, no osan US$ 1.000,” informa Zhouliyun ba GMN iha Elemloi Aldeia São Jose horseik.

Nia esplika, situasaun ne’e akontese mais ou menus iha tuku 3:00 madrugada OTL, maibé loja nain sira la senti, tanba toba dukur hotu.

“Maske Camera  monta iha loja laran,  maibé la detekta klaru, tanba ema ne’e uza sapeo no uza masker taka metin nia oin, no problema ne’e hato’o ona ba parte Polisia Nasional Timor-Leste, nomos Autoridade  lokal sira,” katak Zhouliyun.

Nune’e mós traballador ne’ebé servisu iha loja ne’e, Fernanda Martins, hateten, akontesimentu ne’e ba dala rua ona.

“Uluk mós ema ida mai iha oras tuku 9 dader, hodi bosok haruka patraun, depois foti patraun nia telefhone ida ho  folin US$ 1000, hodi sai liu no la konsege kaer, tanba ema ne’e halai liu tiha ona,” informa Fernanda.

To’o nótisia ne’e públika, Jornalista GMN seidauk konfirma ho parte Polisia kona ba ba autor ne’e. aba.