PM Taur apela ba komunidade labele soe lixu arbiru

Primeiru Ministru, Taur Matan Ruak, apela ba komunidade sira atu labele soe lixu arbiru iha fatin públiku, maibe soe iha fatin lixu ne’ebé governu liu husi Minisípiu Díli prepara ona.

“Foer iha sorin-sorin ne’e mai, imi la hili. Foer sira ne’e imi la hili imi tau hamutuk hela iha ne’e, pois ami mak mai raut. Ha’u kompriende katak imi buka moris, maibe tenki haree foer sira ne’e raut, hamos, imi mak tenki hamos imi nia fatin”,dehan PM Taur Matan Ruak, Sesta (22/2/19), ba peskador sira ne’ebé hela besik Lesidere, Díli, bainhira hamutuk ho funsionáriu públiku, Falintil Forsa Defeza Timor-Leste, no Polísia Unidade Marítima, hala’o limpeza jerál iha Jardin Largo Lesidere, to’o Iha Tasi Ibun Metiaut, Díli.

Limpeza jerál ne’e halao bazeia ba rezolusaun governu, númeru 8/2019, ne’ebé Konsellu Ministru aprova iha loron 20 fulan Fevereiru, konaba promosaun asaun limpeza  jerál.

Primeiru Ministru, Taur Matan Ruak,  mobiliza instituisaun estadu, no sosiedade sívil sira, hala’o limpeza jerál iha kapital díli.Atividade limpeza jerál ne’e hahú iha tuku rua lorokraik.

Programa limpeza jerál ne’e atu hamos foer, iha fatin públiku atu asegura ambiente ne’ebé mos,  hado’ok moras husi komunidade  no proteje biodiversidade sira iha tasi laran.

Limpeza jerál nee fahe ba ministeriu sira, primeiru ministru, membu polisia no membru f-fdtl sira halao limpeza iha tasi ibun largo lecidere too suku metiaut, ministeriu sira seluk halo limpeza tama sai bairo no mota laran sira iha díli laran.

Foer sira ne’ebé rekolla ne’e parte saneamentu tula tu-tuir hodi ba fakar lixu fatin tibar.

Atividade limpeza jeral ne’e hanesan manifestasaun ida husi konstituisaun RDTL artigu 6, ne’ebé  eziji governu hodi proteje ambiente ne’ebé moos.JNDiário