Aviaun komersiál foun lima sei halo operasaun mai TL

Aviaun Komersial husi nasaun lima, Malázia, Singapura, Filipina, Brunei Darusalam no Nova Zelandia iha tempu badak sei mai asina akordu ho governu atu fasilita Airlines sira ne’ebé halo operasaun mai Timor – Leste.

Ministro Transportes e Comunicações, José Agustinho da Silva hato’o lia hirak nee ba Jornalista sira, hafoin hasoru malu ho Primeiru Ministru, Kuarta-feira nee iha Palasiu Governu.

“Ohin hau halo ajendamentu iha tempu badak, hau sei desloka ba Kuala Lumpur Malázsia para atu asina akordu ida,…, ho Governu Malázia ho Ministru Transporte Telekomunikasaun Malázia nian atu nune’e bele fasilita Airlines sira husi Malázia bele tama mai iha Timor, ba futuru Governu sei asina tan ho Governu sira seluk hanesan Singapora, Filipina,Brunei Darusalam,Australia ho New Zelandia ,wanhira airlines mai barak signifika presu aviaun ou bilete aviaun bele tun ona”, espera  Ministru Transporte Telekomunikasaun José Agustinho da Silva.

Governante nee  esplika hahú iha fulan Novembru mai to’o ohin loron, presu tikete aviaun nian sai problema bo’ot ba konsumidores ,tamba ne’e Governu liu husi Ministeriu Transporte Telekomunikasaun esforsu buka solusaun.

“Hahú husi fulan Novembru to’o mai agora presu tikete ou bilete aviaun nian ne’e sai peizu ba ita nia konsumidores sira ne’ebé mak halo viajen ba estranjeiru ,tamba ne’e mak Governu liu husi Ministeriu Transporte Telekomunikasaun esforsu atu oinsa bele halo asina akordu ho ita nia nasaun vizinu sira”nia informa.tos