JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

MNEK: Governu sei asegura Timor-oan sira iha Xina husi vírus Corona

MNEK: Governu sei asegura Timor-oan sira iha Xina husi vírus Corona

Ministru Negósiu Estranjeiru no Kooperasaun (MNEK), Dionísio Babo Soares, hatete, Governu Timor-Leste (TL) sei foti medida hodi asegura Timor-oan sira ne’ebé hala’o estudu iha  Xina, atu labele kona vírus Corona, ne’ebé hamate ona ema barak iha sidade Wuhan, fatin ne’ebé vírus ne’e espalla.

“Ita-nia estudante hamutuk 170 iha Xina. Husi númeru ne’e nain 18 mak iha sidade ida naran Wuhan, sidade ida ne’ebé mak mosu  vírus ida naran Corona, ne’ebé to’o agora seidauk iha aimoruk. autoridade Xineza sira hola tiha ona medida preventiva, ne’ebé taka tiha sidade ne’e labele sai no labele  tama, no ita-nia estudante sira ne’e iha ne’eba hela, tanba ne’e mak ohin ami tenta para iha  enkontru ministerial hodi haree to’ok  saida mak  ita  bele halo”, dehan Dionísio Babo ba Jornalista sira Segunda (27/01/2020), iha Palásiu Prezidensial.

Nia afirma, karik governu TL bele kontakta Governu Xina para bele haree estudante sira ne’ebé hela deit iha dormitóriu, sira labele sai, tenke taka hotu sira-nia aan para la bele hetan moras, tanba vírus ne’e  mos hadaet ona ba nasaun barak.

“Ita mós husu ba ita nia maluk Timor-oan sira, kuidadu atu tuir  Guia ne’ebé mak Ministériu Saúde hamutuk ho Organizasaun Mundial Saúde ne’ebé fó sai tiha ona, tenke fase liman  bebeik,  labele kaer liman ho ema seluk arbiru, labele besik ema ne’ebé mak fani beibeik, ita tauk moras ne’e kona bele halo ema mate. Ami halo kontakta ona ho Beijing, ita-nia estudante sira diak hotu hela, to’o agora seidauk iha Timor-oan ida hetan moras Corona, ita espera sei bele  proteje aan nafatin, no Ministériu Negósiu Estranjeiru halo nafatin kontaktu, bele haree saida mak ita atu halo”,hakotu Dionísio.

PN ezije Governu foti medida urjente ba prevensaun vírus corona

Reprezentante povu iha Parlamentu Nasionál (PN), ezije governu atu hola medida ho sériu hodi halo prevensaun ba vírus Corona labele tama mai Timor-Leste (TL).

Xefe bankada FRETILIN, Aniceto Guterres ezije governu atu hola medidas ho seríu, tanba vírus refere rízku tebes ba ema nia vida no da’et ho fasíl tebes.

Lee hotu :   Lixeira de Tíbar: Perigos à espreita na comunidade

Alende ne’e, bankada FRETILIN mós prepara ona karta ida, hodi husu governu konvoka debate ho urjente, hodi buka meneira, oinsa prevene vírus refere to’o TL.

“Mundu tomak agora preokupa loos, tanba kontaktu komunidade entre ema Xina ne’e iha mundu tomak, kuaze ita Timor ne’e Xina mak barak loos, ema sira ne’e foin dadauk imlek fila hotu tiha ba, loron ida rua tan kalo balun mai fali ona. Ita lahatene ita-nia governu ne’e medidas saida mak hola ona, prepara para atu prevene ida ne’e. Timor-oan sira iha embaixada sira agora ne’e preokupadu, ate balun to’o tanis, agora sira atu halo oinsa. Vírus ne’e to’o ona Singapura, iha Singapura mós kaju 4 tiha ona, Singapura ida ne’ebé ema nia Sistema kontrolu saúde ida di’ak, no fronteira buat hotu-di’ak ne’e de’it mós kaju 4 ona, la imajina se TL mak vírus ne’e tama, ita lahatene sai oinsa loos, se ema sira iha fronteira ne’e mak sibuk simu osan de’it, la interese atu mate ka saida. Imigrasaun, seguransa, ministériu saúde, tenke sériu, tanba orsida nia mai ne’e laharee ida ne’ebé mak povu ki’ik, no laharee ida ne’ebé mak membru governu ka, semak PLP ka CNRT ka FRETILIN. Tanba interese nasionál, ita ezije medidas imediatas no konkreta para atu halo prevensaun. Tanba ne’e, nível PN, husi bankada FRETILIN, sei hatama karta, atu husu debate ida urjensia ho MNEK, intervensaun saida mak halo ona, no oinsa atu koordena no evita ema sira ho vírus ne’e tama iha ne’e, imigrasaun ho saúde, seguransa hotu. Vírus ne’e urjente, tanba ema iha rai seluk ne’e ema siaga 1  tiha ona, osan mak laiha ne’e problema seluk ida, ate osan laiha ne’e mak vírus atu tama lalais”, hateten xefe bankada Fretilin, Aniceito Guterres Lopes iha plenária, Segunda (27/01/2020).

Nune’e, deputadu PD, Adriano do Nascimento mós rekomenda ba governu, atu halo dekretu ida ho urjensia, hodi bandu provizoriu ba ema estranjeiru tama TL, liu-liu ida ne’ebé nota iha sintoma moras refere, no Xinés sira.

Lee hotu :   Promete sei bongkar mafiozu, Cárceres: Rai sei la nabeen wainhira ladauk fó sai

 “Ha’u propoin ba governu atu hola asaun, primeiru mak liu husi MNEK ho imigrasaun, agora dadauk ne’e, ema sira mai husi Xina ne’e ita labele haruka tama lai mai ita-nia nasaun, nasaun balun halo tiha ona hanesan ne’e, depois koko buka dalan para atu instala mákina detekta moras ne’e, ita tenke fó avizu, fó warning, tanba vírus ne’e da’et lais loos, nune’e bele kuidadu iha komunikasaun no ba loja sira Xineza nian ne’e kuidadu, governu tenke halo maneira prevensaun”, katak deputadu PD ne’e.

Hatán ba kestaun ne’e, reprezentante governu iha Parlamentu Nasionál, Ministru Reforma Lejislativa no Asuntu Parlamentares, Fidelis Magalhães sujere ba deputadu sira, atu haruka karta direita ba Primeiru ministru Taur Matan Ruak, hafoin bele orienta nia governante sira, hodi halo diskusaun ba asuntu refere.

Vírus corona, ne’e rasik mosu iha sidade huben Wuhan Xina, iha loron  31 fulan Dezembru tinan 2019. Sintoma ba moras corona ne’e, halo isin manas maka’as, ulun moras, me’ar, fani no dada iss ladi’ak.

Tuir análiza balun fó sai katak, vírus refere mosu, no halo ema barak mate, kauza hosi konsumu naan husi animal, hanesan, Niki, Laho, inklui naan husi samea no seluktan.

Ekipa tékniku MS iha aeroportu comoro preparadu prevene vírus corona 

Ministeríu Saúde (MS), destaka klínika iha Aeroportu Internasional Nicolao Lobato Comoro-Dili, pronto ona kontrola pasajeirus ne’ebé mai husi rai liur, relasiona ho Vírus Corona ne’ebé mosu iha nasaun China.

Ekipamentus ne’ebé hodi detekta Vírus Corona, iha aeroportu internasional preparadu ne’ebé iha maina Termometer rua oinsa bele detekta pasajeirus ne’ebé afeita ona ba vírus corona.

Tuir Diretór Nasionál Kontrola Saúde, António da Costa hatete, kliníka aeroportu hahú preparasaun no serbisu, kona-ba vírus corona ne’ebé mosu iha nasaun Xina, tanba ne’e sira nia ekipa halo ona serbisu ba sidadaun Xineza sira ne’ebé tama mai Timor-Leste liu husi aeroportu internasional.

Lee hotu :   Dom Norberto apoia TL sosa asaun Conoco-Shell

António esplika liutan, klínika ne’e hala’o ona nia funsaun ka serbisu iha semana kotuk, maibé to’o agora seida’uk detekta ema ruma, afetadu ba surtu vírus corona ne’e.

“Ita hahú ho ita nia preparasaun ba, atu responde ba surtu corona vírus iha semana kotuk ita nia minsitra updaet ona informasaun ba iha konsellu ministru, ita kordena ona ho parate relevante ita serbisu hamutuk ona ho óspital no serbisu ambulansia nian, iha ne’e ita iha  profisiónal saúde hodi fó atendementu, atu prevene, ita iha ekipamentu, ita iha thermometer uza karik balun isin manas uza ne’e, meius, ita iha meius seluk iha skrining card ita liga ba iha ajensia aviaun fahe ba pasaseiru ne’ebé mai ho identidade Xinesa, ami aprezenta de’it preparasaun oinsa atu antisipa no asegura katak ita iha ona ministériu saúde ho komponente ne’ébe relevante hodi responde ba surtu ne’e tanba surtu ne’e isu mundial kordenasaun relevante ita, li-liu ita hetan apoiu husi organizasaun saúde mundial saúde mak suporta ita, ita kontinua kordena ba futuru oinsa atu antisipa no asegura katak ema hotu ne’ebé tama mai timor-leste hodi bele identifika To,o oras ne’e seidauk identifika suspeitu ruma afetadu ba vírus refere to’o agora ita sei livre”, dehan, Diretór Nasionál Kontrola Saúde, António da Costa, ba jornalista sira iha Aeroportu Internasionál Nicolao Lobato, Comoro, Segunda (27/01/2020).

Diretór ne’e esplika, mesmu sira iha ekipamentus mákina termometer rua, maibe ida la funsiona ona, no sira uza de’it ida ne’ebé sei funsiona hodi detekta surtu ne’e, atu prevene vírus corona, no sira nia parte husu atu uza mascra no sira fahe mós brosura.

Total ekipamentu ne’ebé klínika refere iha hamutuk 2, maibé mákina ho marka termu skinner, lá funsiona ona no sira uza de’it mákina termumometer  hodi detekta vírus ne’e

To’o notísia ne’e publika GMN tenta atu halo entrevista ho diretór karantina, maibé la konsege tanba okupadu ho serbisu seluk. oly/say/Ina

Add to Comments Here!!!!

error: Content is protected.
Secured By miniOrange
You might also like:
Governu inaugura mini irigasaun suku Uato-Haco

Ministériu Administrasaun Estatal (MAE), liu husi...

Deskonfia envolve kazu omisídiu, PCIC detein ona suspeitu na’in nen iha Laga

Polícia Científica Investigação Criminal (PCIC)  ezekuta...

Franscisco: TLPU tenke investe maka’as iha kapasitasaun

Organizasaun jornalista Timor Leste Press Union...

Close