Papa adia vizita mai Timor-Leste ba tinan oin

Papa Francisco adia vizita mai Timor-Leste (TL) ho nasaun sira seluk, tanba Papa lakohi povu Timor-Leste, atu sai vítima ba Corona Virus Disease (COVID-19), ne’ebé oras ne’e infeta ona ema iha mundu, besik rihun atus ida sanulu resin tolu.

Papa Francisco rasik simu ona konvite ofisiál husi Estadu Timor-Leste, atu halo vizita mai Timor-Leste iha tinan ne’e. No antes ne’e mós católicnews agency, publika ona katak, Papa sei halo vizita mai oceano iha fulan setembro.   Maibé ajenda vizita Papa rasik kansela ona, no adia fali ba tinan oin.

Núnsiu Apostóliku Vatikanu nian iha Timor-Leste, Moseñor Marco Sprizzi, hato’o lia hirak ne’e, hafoin hasoru malu ho Presidente Repúblika iha Tersa (10/3/2020), iha Palásiu Prezidensial Díli.

“Tanba difuzaun coronavírus covid-19 no atu evita possilidade kontájiu  husi vírus ne’e. Bainhira ema barak hamutuk iha fatin ida possibilidade kontájiu husi vírus ne’e aumenta. Papa lakohi ida ne’e atu sai okaziaun povo Timor-Leste kontájiadu ho coronavírus. Tanba ema barak mak mai hamutuk ho papa durante nia vizita ne’e mak hanesan cardial sira, bispo sira, akompanhante sira, inkluindu jornalista atus resin. Entaun Papa konfirma ona nia aseitasaun katak adia nia vizita ba tinan oin. Ida ne’e hanesan sakrifísiu ida tenke halo ba povu no ita-nia diak, em vez de ita kontente lori simu vizita Papa nian ho risku ba kontájiu. Entaun Santu padre hakarak agradese ba señor Prezidente Repúblika, Primeiru Ministru, Ministru Negósiu Estranjeiru no Kooperasaun, sua ezelénsia Xanana Gusmão ne’ebé aseita ona atu sai koordenadór ba vizita ne’e”.

Entretantu, Santo padre adia fali nia vizita mai Timor-Leste, iha tinan oin ho data ne’ebé mak seidauk fiksu.

Ho adiamentu ne’e, Monseñor konsidera, Timor-Leste bele prepara di’ak liu tan, ba simu vizita amu Papa nian, liu-liu evita kontájiu covid-19, liu husi prosedimentu sira, ne’ebé estabelese husi Ministériu Saúde ho Organizasaun Mundial Saúde.

“Kona-bá data ita seidauk hatene, depende ba andamentu coronavírus se vírus ne’e diminui bele mos iha fulan dahuluk tinan nian, depende mos ba agenda Papa nian, agenda santo padre nian mos la’os fasil, Papa hanesan líder mundial ida, maibe viagem ida ne’e hanesan primeiro interrese Papa nian. Ita hotu akompanha iha nível kontaktu diplomátika nian atu difine data lolos”, hateten moseñor.

Propagasaun epidemia coronavírus dadaun ne’e, espalla ona iha nasaun besik atus ida resin, no hamate ona ema rihun haat resin. Entretantu iha Timor-Leste, seidauk iha kazu kornfirmadu, pozitivu ho covid-19.oct