JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

Xanana: Líder Fretilin demagogia iha projetu Kosta Sul

Xanana: Líder Fretilin demagogia iha projetu Kosta Sul

Líder karismátiku Kay Rala Xanana Gusmão, hatete, líder bo’ot partidu Fretilin nian oras ne’e dadauk halo demagogia iha projetu Kosta Sul ninian kona ba petrolíferu, tanba ohin koalia ida, aban koalia oin seluk fali.

Tanba ne’e Xanana husu ba jerasaun foun sira presiza matan moris no neon nain atu labele monu tama ba demagogia ka liafuan ‘sunu’ sira husi líder bo’ot Fretilin nian ne’e, liu-liu buka hatene kona-ba fronteira marítima entre Timor-Leste ho Austrália ne’e no oinsa atu dada kadoras husi kampu mina-rai Greater Sunrise (GS) mai Timor-Leste, hodi loke fali ou bele hakbi’it fali setór sira seluk.

Tuir eis xefe negosiadór fronteira marítima, Kay Rala Xanana Gusmão, katak, dokumentu hotu ne’ebé kona-ba Timor-Leste manan Austrália no estudu viabilidade sira oinsa dada kadoras husi GS mai rai-laran, iha hela. Tanba ne’e Governu presiza divulga sasán sira ne’e ba públiku atu jerasaun foun no mos populasaun sira bele intende, no ekipa ne’ebé uluk servisu ba asuntu ida ne’e, sira prontu partilla informasaun hirak ne’e ba povu tomak.

“Atu hatudu deit demagogia bo’ot ne’e, ha’u labele husik liu atu halo komentáriu ida ba deklarasaun públika husi líder boot Fretilin nian katak, Fretilin mak hahú defende kadoras GS mai Timor, maibe ekonomia ne’e iha ninia regras no atu hahú tenke iha estudu viabilidade no ha’u seidauk haree estudu ruma kona-ba estudu viabilidade ne’ebé bele konvense ha’u, ita hotu hakru’uk ba afirmasaun hanesan ne’e, maibe kuandu hau hakru’uk, ha’u sente konfuzu tebes ho deklarasaun ida ohin temi katak Fretilin sempre defende hori uluk kedas kadoras tenke lori mai Timor-Leste, mezmu que seidauk iha estudu covicentes, kontradis uitoan, ‘Hetan kedas basa liman maka’as husi partisipante sira hodi hamnasa’. Líder boot fretilin nian ne’e dehan bainhira iha 2018 asina tratadu fronteira marítima ho Austrália iha Nova Iorque katak líderes país ne’e sempre ho hanoin ne’ebé hasoru malu ho objetivu atu lori kadoras mai Kosta Sul, kapaas los, ha’u mos hakru’uk fali, mas tanba ha’u hakru’uk, ha’u hanoin katak ita bele husu, nune’e ka? Ooohhh nune’e ka? Mezmu que laiha estudu convicentes señor? Tanba ida ne’e dala ruma halo demagogia maka’as tebes, la sukat liafuan. Todan liu mak ne’e kompañeiru sira, dalaruma ita sente ita-nia laran todan teb-tebes dehan Fretilin mak defende uluk liu kadoras mai Timor, ha’u atu tau deit ba kompañeiru sira demagogia, asbungia, asbun, katak ita koalia deit, hakilar nune’e mas ita laiha baze ida atu dehan katak regula uitoan ita nia rasiosinu. Tanba agora nia dehan katak, agora labele aseita tanba laiha estudu convicentes atu haree, maibe uluk bele, mezmu que laiha estudu convicentes, maibe ita mos bele hanoin, karik laiha estudu convicentes mak (Marí Alkatiri) ba asina tiha CMATS (Certain Maritime Agreement on the Timor Sea) karik? Se nune’e agora lalika temi, ne’e ka lae, tanba lae ohin ita temi oin ida, aban ita temi fali buat seluk. Ho buat sira ne’e hotu líder boot Fretilin nian foti fali kestaun kona-ba tratadu fronteira marítima, hodi dehan katak, tratadu ne’e la afirma loloos ita-nia soberania tanba Austrália sei iha buat ruma atu koalia kona ba explorasaun GS. Kuandu nune’e ita hanoin hetan fali iha tempu atu finaliza tratadu fronteira marítima no atu deside asinatura tratadu ne’e iha loron 6 de marco 2018 iha Nova Iorque, líder boot ne’e kaer hela Governu, halo ita mak husu fila-fali Primeiru Ministru (Mari Akatiri) iha tempu ne’eba laiha kedas asesu ba dokumentasaun tomak lori Konsellu Ministru aprova tratadu ne’e? lider ne’e la hetan informasaun teknikamente, politikamente kona ba termus tratadu ne’e nian? Tanba ho deklarasaun hanesan ne’e halo ita husu fali líder boot FRETILIN ne’e la konvensidu. Se nune’e tansa mak nia autoriza aprovasaun husi Konsellu Ministru ba tratadu ne’e, se nia la kompriende? Matenek boot ida iha mundu naran Albert Einstein, nia dehan nune’e: Fasil liu atu muda natureza protóniu nian, do que muda natureza maldoza ema nian”, dehan Xanana iha semináriu nasional, ne’ebé organiza husi Movimentu Profisional Apoiu Xanana (MOPAX) ho tema “Maun Boot Kay Rala Xanana Gusmão Ho Partidu CNRT Mak Bele Asegura Riku Soin Timor-Leste Nian”, Sábadu (12/9/2020), iha salaun Igreja Katedral-Díli.

Lee hotu :   [:pt]Governu husu povu hapara konsume mizone-rabisadu[:id]Governu husu povu hapara konsume mizone-rabisadu[:en]Governu husu povu hapara konsume mizone-rabisadu[:tl]Governu husu povu hapara konsume mizone-rabisadu[:]

Governu labele politiza asuntu GS

Entretantu eis xefe negosiador delimitasaun fronteira marítima, Kay Rala Xanana Gusmão, husu ba Ministru Petroléu no Mineral, Víctor da Conceição Soares, atu labele politiza asuntu Gretaer Sunrise (GS) ba sira-nia interese deit, tanba GS ne’e interese nasionál.

“Ba Ministru Petróleu foun ne’e ha’u rekomenda atu refleta di-diak, antes de politiza asuntu ida ne’e. tanba asuntu ida ne’e gretaer sunrise ne’e interese nasional nian”, dehan Xanana Gusmão.

“Karik Ministru foun ne’e iha duni maturidade polítika no verdadeiru atu hatene kona-ba pasta petroleu nian, tanba nia la’os ahli (peritu) petróleu, loloos nia konvida ekipa ne’ebé foin dadauk nia duni sai tiha atu aprezenta informasaun no estudu hotu ne’ebé hala’o tiha ona iha tinan hirak nia laran, la’os tama ba hasai tiha, duni sai deit. Ha’u la husu atu tau fali sira nain rua (Gualdino-Francisco) iha ne’eba, mas servisu ho honestidade, ho transparensia, ho kapasidade uitoan. O maka ahli (expert) mina-rai, ha’u kala hakru’uk ha’u rei tiha o nia ain”, dehan Xanana.

Xanana mos apela ba Governu atu promove debate no partisipasaun polítika dispolitizada kona-ba tasi mane no kona-ba dezenvolvimentu GS.

“Ita moris hela iha krize internasional ida ne’ebé laiha Prezidente. Krizi ekonómiku, sosial, buat oi-oin deit. Los duni buat barak muda, liu-liu presu petroleu tun, ne’e tanba saida? tanba ekonomia tun”,dehan tan Xanana.

“VIII Governu ne’ebé temi-an konstitusional deside tiha ona atu la tuir ninia programa rasik VIII Governu entaun brani ba hatudu programa foun ida mai, programa ida ne’ebe hatudu duni iha substansia ne’ebe diak, brani ba hodi fo hatene ba povu Timor tomak no husu ba parlamentu atu valida tiha programa foun ne’e, ami husu deit atu halo ho honestidade, transparensia, neebe ita nia povu hein no merese.”

Lee hotu :   Família halót ona mate isin trajédia Kuluhun ■Provizóriu arguidu 4 fila ba vida sivíl

“Ita hotu rona temi dehan grandes mudansas. Grandes mudansas iha pilar estruturante nasaun nian labele halo ho despedimentu ka hasai ema arbiru no la halo ho koalia mamuk deit, asbun, asbun (asal bunyi) deit. Ministru petroleu dehan iha mudansas barak iha setor petrolíferu ba rai ida ne’e, no katak iha vizaun estratéjika husi Governu ba setor petrolíferu, kapaas tebes, maibe ita iha direitu atu husu, vizaun ne’e iha ne’ebé?  Misaun estratéjika ba setor petroliferu ne’e saida los? Ha’u nuudar sidadaun ida hau mos iha direitu atu ezije ba Governu atu aprezenta ba povu tomak atu aprezenta vizaun estratéjiku iha setor petrolíferu ba rai ida ne’e alias sidadaun hotu-hotu iha direitu atu ezije ne’e ba Governu. Mezmu sidadaun sira la ezije, Governu iha devér atu aprezenta estratéjiku foun ne’e! tanba Governu tenke presta kontas ba sidadaun ka ba povu tomak.”

Xanana dehan, Governu tenke iha hanoin ona oinsa ba future ne’e oinsa ho projetu Kosta Sul no GS ninian, hafoin COVID-19 laiha. Tanba labele monu tama deit ba malae sira-nia lasu, dehan dada ba deit Australia depois mak fahe lukru, ida ne’e sala no labele.

“Mas se ita rona deit ba malae sira dehan oiii petroleu tun tiha ona be diak liu dada deit mai Darwin, dehan ó atu simu osan, ó simu fali halonusa. Kuandu hanesan ne’e iha krizi boot hanesan ne’e ita tenke hanoin bainhira krize ne’e hotu ita atu halo saida?”, dehan Xanana.

Xanana afirma, nia luta ba defende minarai husi tasi Timor no defende soberania nasional liu-liu fronteira marítima ne’e la’os foin horiseik horibairuak, maibe dezde kedas nia sei luta iha ai-laran hanesan komandante em xefe Falintil.

Lee hotu :   POVU INTELIJENTI DUNI IHA ELPAR

Xanana mos haktuir, iha tempu independénsia nia polítika hodi lori kadoras mai rai-laran ne’e hetok konkretiza tanba hasoru nasaun zigante hanesan Austrália ne’ebé ukun-an kleur ona, maibe nia konsege ho nia ekipa ho povu tomak manan fronteira marítima.

“Jornalista ida Robert Dom primeiru jornalista Australianu ida ne’ebé konsege  tama to’o ai-laran hodi entrevista ha’u iha Ponaria, ho nia ha’u denunsia polítika immoral husi Austrália, ne’e katak la’os horiseik mak ha’u mehi kona ba defende mina-rai mai Timor, maibe dezde kedas ha’u iha ai-laran. Malae sira ne’e uluk halo ita hakfodak oitoan,  maibe agora bainhira ita haree ita la hakfodak ona. Maibe agora ita hakfodak fali ho Timor-oan sira iha rai-laran rasik maka lakohi kadoras GS mai Timor, tanba alisiamentu atu lori kadoras ba Darwin”,dehan tan Xanana.

Xanana dehan, hafoin manan fronteira marítima ho Austrália, rekursu sira ne’e agora partense ba Timor-oan nian ona tuir aspetu polítiku no jurídiku internasional no nasional ninian. ina

Add to Comments Here!!!!

error: Content is protected.
Secured By miniOrange
You might also like:
Joaquim dos Santos: É necessário regulamento suplementar que assegure trabalho de CAC

O Presidente da Comissão A do...

MS: Governo perde controlo de entradas ilegais

O Executivo perdeu o controlo de...

PR ‘Lú Olo’ preocupado com entradas e saídas ilegais através das fronteiras

O Chefe da Casa Civil da...

Close