SEKOMS no órgaun komunikasaun halo kampaña kombate hoax

Sekretáriu Estadu Komunikasaun Sosial (SEKOMS), Mericio Juvinal Akara, hateten, objetivu husi orgaun komunikasaun sosiál inklui estudante sira hala’o kampaña nasionál ne’e, hodi kombate informasaun falsa (hoax) no promove internet saudavel.

“Intensaun hosi kampaña nasional Kombate Hoax ka Informasaun Falsa no Promove Internet Saudavel ne’e oinsa hasa’e ema hotu nia konsiensia kona-bá impaktu negativu hosi hoax ka lia falsu ba sosiedade no oinsa atu redus sirkulasaun hoax liu hosi asaun fahe tutan informasaun falsa, hodi evita sosiedade asesu imformasaun ne’ebé laloos, tanba ne’e husu ba entidade sira hamutuk ho Estadu ita kombate hoax, tanba fó informasaun lia falsa ne’e fó mós impaktu ba sosiedade sira hodi pániku”, SEKOMS ne’e liu husi ninia diskursu iha Golgota Mall, Sesta (23/10/2020).

SEKOMS, Akara, fó apresiasaun mós ba entidade sira hotu ne’ebé bele realiza atividade ne’e.

 “Liu husi biban ne’e SEKOMS hakarak fó komprimentu no fó apresiasaun ba susesu ne’ebé ita-boot sira halo tiha ona, iha momentu ida ne’e mós SEKOMS preokupa ba hoax ou lia falsu sai ona nu’udár pandémia ne’ebé habelar haboot iha sosiedade, hodi fó impaktu negativu ba ema nia hanoin no mós hahalok, impaktu negativu husi hoax ka lia falsu ne’e afeta ba komunidade hahú husi nível estudante juventude no mós sosiedade injeral liu husi forma verbal eskrita imajen karikatura no seluk tan, iha era dijital hoax barak liu habelar haboot iha mídia online liu husi Facebook”, tenik Akara.

Atividade kampaña ne’e hala’o hahú husi Rotunda Prezidente Nicolau Lobato to’o iha Golgota Mall no atividade ne’e organiza hosi SEKOMS.

Kampaña ne’e hetan mós partisipasaun husi estudante UNTL Departamentu Komunikasaun Sosiál, estudante sekundáriu balun iha kapital Díli, inklui autoridade lokal suku Comoro no tuir planu atividade kampaña ne’e sei kontinua halo iha munisípiu sira. aba