Suspeitu ida foti bebé halai sai husi HNGV

Suspeitu ida foti  bebé  halai sai husi Hospital Nacional Guido Valadares (HNGV) sein koñesimentu husi  médiku sira.

Kazu ne’e akontese Tersa (20/10) wainhira bebé ne’e baixa hela iha HNGV, suspeitu  ho inisiál AE, haruka nia espoza tama hariis fatin  suspeitu núdar bebé nia aman rasik foti bebé hodi  halai sai husi sala durante loron ida, sein  fó hatene ba nia espoza no médiku sira.

“Ha’u-nia oan moras mak lori mai baixa iha ospitál, ami na’in rua  núdar fen ho laen laiha problema ida, nia haruka ha’u ba hariis tiha, derepente nia lori labarik hala’i sai tiha la fó hatene ha’u  ida. Ha’u  nia katuas oan foti labarik sai iha tuku rua lorokraik”, Bebé nia inan Elsa Orleans ba jornalista sira, Kinta (22/10/2020), iha HNGV-Díli.

Alende ne’e suspeitu AE, núdar bebé nia aman haktuir, kazu ne’e akontese, tanba suspeitu nia espoza lees tiha osan USD 20, ho aktu  refere  suspeitu sente osan laiha ona atu selu kareta fila-fali ba Ainaro, suspeitu deside foti nia oan hala’i subar husi ospitál.

“Ha’u rian no tiu sira hirus hela de’it ha’u. Ha’u mai hein ha’u nia oan ami na’in rua tuur besik malu mós la ko’alia ba malu ne’e, depois ha’u lori ha’u nia oan hala’i sai husi ospitál, tanba ha’u nia ferik-oan lees tiha osan  USD 20”, dehan suspeitu AE.

Relasiona ho kazu ne’e, vítima hato’o ba Polísia Eskuadra Cristo-Rei, hodi buka tuir suspeitu no kaptura suspeitu, hodi entrega hikas bebé ne’e ba iha HNGV, hodi  hala’o tratamentu.

Ho aktu ne’e, suspeitu tenke submete ba prosesu identifikasaun iha Kuartel PNTL Caicoli-Díli.

Bebé ne’e baixa iha HNGV  iha sala pediatria, hahú iha loron 23, fulan Setembru, tanba moras ran menus.

No iha  Kuarta, semana ne’e,  médiku sira haruka bebé ne’e alta hodi fila ona ba uma. avi