Osorio Florindo : “Governu la halo deskriminasaun ba atletas”

Secretario Estado Desporto no Promoção Alta Competição (SEDPAC), Osorio Florindo,  desmente deklarasaun ba Prezidente Comitê Paralympico Timor-Leste (CPNTL), Julio Sarmento ne’ebé hateten SEDPAC halo deskriminasaun tanba la valoriza atletas ema ho defisiencia ne’ebé iha tinan 2017 rekoilla medalha osan mean rua no bronje ida husi Sea Para Games iha Malaysia.

Governante nee ba jornalista sira deklara, iha Tersa (29/5), Governu la halo deskriminsaun ba atletas tamba governu sei valoriza atleta sira ho prestasaun maibe tenke iha legalidade.

“Dala ida tan, liu husi Secretaria Estado Desporto e Promosaun Alta Competição sei konsidera nafatin prestasaun sira ne’ebé mak halo ona ne’e, maibe hau sei labele selu kuandu la iha legalidade. Minimal iha despaixo ruma ne’ebé Governu anterior rai hela ka iha, ou minimal iha TOR (Term Of Reference-sigla Inglesh) ruma iha entaun lori mai hau haree nune’e bele selu tuir, tanba lei la iha, tanba ne’e osan Estadu nian, maske nune’e sedu ou tarde mos Estadu sei selu,” hatutan SEDPAC, Osorio Florindo.

Osorio Florindo husu ba atleta sira atu labele lakon korajen nune’e kontinua prepara-án ba eventu Asian Games tinan ne’e, ne’ebé sei hala’o iha Palembang no Jakarta Indonesia, iha fulan Agostu.

“Hau fó korajen nafatin ba atleta sira, prepara-án didiak tanba lakleur tan ita atu ba partisiapa eventu Asian Games tinan ne’e,” dehan SEDPAC, Osorio Florindo.

Medalha osan mean rua ne’ebé oferese husi atleta Teofilo Freitas hafoin okupa pozisaun primeiru lugar ba kategoria halai maratona metru 400 no 800.

Enkuantu Medalha bronje oferese husi atleta foti besi Silveiro Martins Soares hafoin okupa pozisaun terseiru lugar iha kategoria mane ho todan kg  110 iha kompetisaun Sea Para Games 2017 iha Malazia. Ito