TR notifika PN, MF: Ezekusaun OJE 2021 la’o tiha ona

Ministru Finansa (MF), Rui Gomes, hateten, ezekusaun Orsamentu Jerál Estadu (OJE) ba tinan 2021 kontinua la’o, maske Tribunál Rekursu (TR) notifika ona Parlamentu Nasionál (PN) kona-bá legalidade orsamentu refere.

“Ha’u rona notísia katak PN mós aprezenta rekursu ba TR, ne’e kompeténsia TR atu hatán, komunika tiha ona ami hatene sim, depois ita sei hare’e”, MF ne’e hafoin hala’o enkontru regular ho Primeiru Ministru (PM), Taur Matan Ruak, iha Palásiu Governu, Segunda (18-01-2021).

Rui Gomes esplika, ezekusaun ba OJE 2021 hahú la’o ona, nune’e agora tempu ba ema hotu hodi kontribui, maibé kona-bá notifikasaun ne’ebé TR hato’o ba PN ne’e kompeténsia PN nian.

“Sistema informátika jestaun finansa públika funsiona di’ak, ezekusaun orsamentál mós hahú tiha ona semana kotuk, buat hotu iha kontrola nia okos tantu di’ak hela, ha’u só apela de’it atu ita hakmatek, mai ita kontribui hamutuk para atu rekupera ita-nia ekonomia, halo moris sosiedade ne’e di’ak liu tan”, tenik Governante ne’e.

TR hato’o karta notifikasaun ba PN iha loron 12, fulan Janeiru, tinan 2021, hodi halo fiskalizasaun konstitusionalidade kona-bá artigu balun iha OJE 2021, ne’ebé pedidu refere mai husi deputadu bankada CNRT.

OJE ne’e rasik hetan promulgasaun husi Prezidente Repúblika (PR), Francisco Guterres “Lú Olo” iha loron 28, fulan Dezembru, tinan 2020, ho dekretu PN númeru 26/V OJE 2021. ida