Governu prosesa ona pagamentu ba distribuidór sesta bázika

Ministru Koordenadór Asuntu Ekonómiku (MKAE), Joaquim Amaral, hateten, iha semana ne’e, Governu sei halo pagamentu ba kompañia distribuidór sesta bázika ba komunidade sira.

Governante ne’e hateten, dau-daun ne’e ministériu implementadór sira prosesa no halo ona kontaktu ho kompañia sira, atu prosesa sira-nia dokumentu administrativa iha Ministériu Finansa (MF) atu halo pagamentu.

“Kona-bá kompañia fonesedór sira, agora sira sei hala’o hela sira-nia servisu, kompañia sira ne’ebé distribui sesta bázika hotu ona, ministériu implementadór hahú prosesa ona sira-nia pagamentu. Semana ne’e sira  bele prosesa ona sira-nia pagamentu, ha’u hein katak bele hetan pagamentu la-lais liu iha semana ne’e ka semana oin, prosesu la’o ona, ministériu implementadór sira iha kontaktu ho kompañia sira atu bele prosesa sira-nia dokumentu administrativa atu hatama iha MF, hodi bele halo pagamentu”, MKAE ne’e iha Parlamentu Nasionál (PN), Tersa (16-02-2021).

Antes ne’e, Jestór Kompañia Lisun, Pascoal Suri Mali, deklara, kompañia Lisun taka ona sistema distribuisaun sesta bázika ba benefisiáriu sira husi suku Bairro Pite, Comoro no Lahane, tanba Governu seidauk halo pagamentu, maske antes ne’e MKAE deklara katak, pagamentu ba empreza distribuidór sira sei hala’o iha fulan ne’e.

Alende ne’e, MF mós hasai ona sirkulár ida hodi ko’a osan porsentu hitu husi kada ministériu hodi apoia Programa Sesta Bázika. Maibé dau-daun ne’e Governu seidauk halo levantamentu Fundu Petrolíferu (FP) husi Banco Central de Timor-Leste (BCTL) no Ministru Finansa, Rui Augusto Gomes, deklara, prosesu levantamentu sei hahú iha fulan Fevereiru ne’e. ety