Arguidu nain tolu deskonfia esplora no fa’an ema

Arguidu ho inisiál FC, APL no FS deskonfia fasilita no kontribui oferese fatin no halo esplorasaun ba atividade prostituisaun.

Tuir akuzasaun Ministeriu Públiku, iha loron 27 fulan Novembru tinan 2014, polísia nasionál seksaun investigasaun kriminál (PNSIC) halo operasaun ba fatin prostituisaun iha Díli laran, ne’ebé kobre área hirak hanesan Bairopite iha tuku 10:00 dader, Aitarak-laran por volta tuku 14: 30  no Comoro mais ou menus tuku 14:00 hodi kaptura arguidu sira ho inisiál FC, APL, FS ne’ebé antes ne’e polísia identifika ona nudar autór ba asaun esplorasaun no oferese no fasilita fatin hodi halo prátika prostituta.

Iha akuzasaun hakerek mos arguidu sira oferese fatin hanesan kuartu mamuk ba ema (feto-mane) hodi halo prátika relasaun seksuál no arguidu sira simu osan hosi ema ne’ebé okupa sira nia fatin ka kuartu.

Ho hahalok hirak ne’e, MP akuza arguidu sira ho artigu 174 ba krime esplorasaun seksuál ho pena prizaun entre tinan 3 to’o 10 no artigu 166 ba venda de pessoas ho pena prizaun entre tinan 2 to’o 8.

Iha primeiru julgamentu horseik (2/10/17), arguidu FS no APL deklara katak, akuzasaun ne’ebé MP fó loos, maibé sira laiha intensaun no hanoin atu halo esplorasaun no la oferese fatin ba pesoál hirak refere atu prátika hahalok prostituta.

Rona tiha deklarasaun ne’e, tribunál deside adia julgamentu ba loron 12 fulan Outubro 2017, tuku 17:00 lorokraik hodi kontinua rona deklarasaun hosi arguida FC inklui deklarasaun hosi vítima sira.

Audénsia julgamentu prezide hosi juíz koletivu Ivan António Suritay, Maria Modesta no Edite Palmira. Ministériu Públiku reprezenta hosi Nelson Carvalho no arguidu sira hetan asisténsia legál hodi defensór públiku Manuel Sarmento. zil