KANDIDATU MEMBRU GOVERNU IHA KAZU, PJR KONSIDERA SEGREDU JUSTISA

Prokurador Jeral Repúblika (PJR), José da Costa Ximenes, promete sei la fo sai informasaun kona-ba polémika lista kandidatu membru Governu da-ualu balun  seidauk simu pose ne’ebé deskonfia envolve iha kazu, tamba ne’e nu’udar segredu justisa.

“Ha’u lakohi fo komentáriu ba kestaun balun ne’ebé iha segredu justisa, portanto ne’e la’os agora mak ha’u dehan, maibe husi uluk kedan ha’u dehan sira ne’ebé iha investigasaun normalmente ha’u la fo informasaun  tamba protesaun ba segredu justisa,”dehan PJR, José Ximenes ba Jornalista sira hafoin remata enkontru ho Prezidenti Repúblika, Francisco Guterres ‘Lú Olo’, Tersa (17/07/2018), iha Palasiu Prezidensial  Nicolau Lobato-Bairo Pite, Dili.

Nia afirma, ida ne’ebé mak iha ona desizaun  tránzitu julgadu ne’e mak sira bele fo sai informasaun, tamba Ministé Públiku ne’e kumpri de’it prinsipiu legalidade, tamba ne’e sira la bele halo violasaun ba prinsipiu legalidade.

“Ha’u lakohi fo informasaun ida ne’e, mas ha’u hakarak depois iha tempu  propriu ha’u sei fo informasaun kona-ba  ida ne’e, tamba iha ámbitu kooperasaun institusional orgaun titular no orgaun soberania sira iha komunikasaun, no iha komunikasaun sira ne’e la’os merese atu pasa informasaun ba media komunikasaun sosial sira,” hatutan José Ximenes.

Iha fatin  hanesan,  Prezidenti Tribunal  Rekursu, Deolindo dos Santos, ne’ebé hala’o enkontru mos ho Prezidenti Republika iha oras ne’ebé la hanesan esplika,  kestaun kona-ba lista ne’e, puramente kestaun polítika, ne’ebé  presiza trata entre partidu ne’ebé hetan asentu iha Parlamentu Nasional atu bele fo solusaun  hamutuk ho Prezidenti Repúblika,  no ida ne’e la iha buat ida ne’ebé iha relasaun  ho komptensia ne’ebé Tribunal rasik  iha.

“Kuandu bainhira prosesu tama ona iha Tribunal, klaru ba públiku katak, a partir akuzasaun tama iha Tribunal, entaun ita-nia lei prosesu penal iha artigu 75 ne’e permite para kualker ema ida ne’ebé iha interese bele hatene kona-ba prosesu ne’ebé la’o iha tribunal, mas iha kestaun balun lei rezerva tenki-ser ho autorizasaun ho Tribunal nian,”subliña Deolindo.Oly