MJ-PNTL tenki rekolla pasaporte husi ema komete krime

Atu asegura ema ne’ebé maka komete kazu iha Timor-Leste, labele hala’i se’es tiha husi justisa, Xefi bankada União Democrática Timorense-Frente Mudança (UDT/FM), Gilman Exposto dos Santos sujere ba Ministériu Justisa (MJ) no parte seguransa Polísia Nasionál Timor-Leste (PNTL), atu rekolla pasaporte husi ema hirak ne’ebé maka komete hela krimi iha Timor-Leste.

“Husu ba parte husi justisa, hanesan Ministériu Públiku (MP),Tribunal Rekursu (TR), inklui mós seguransa atu rekolla pasaporte husi ema hirak ne’ebé maka komete krimi iha ita nia nasaun, para labele hala’i sai husi husi Timor-Leste, tanba Timor seidauk iha lei extradisaun no atu halo lei refere la fasíl, primeiru tenki iha konkordansia entre nasaun sira”, Xefi bankada UDT/FM ne’e ba jornalista sira iha uma fukun PN, Tersa (22-01-2019).

Nia esplika, sé Timor-Leste seidauk iha konkordansia ho nasaun seluk kona-bá lei extradisaun, Governu tenki halo akordu ho nasaun sira seluk, atu nune’e wainhira sira nia ema mai iha Timor-Leste no komete krimi no hala’i ba sira nia rai karik, fasíl atu kaptura, tanba iha akordu ho sira nia nasaun.

“Atu nune’e, sé ema estranjeiru ruma komete kazu iha ita nia nasuan, depois hala’i tiha ba ninia nasaun, Timor bele husu ninia nasaun haruka fila ema refere hodi submete ba justisa iha Timor-Leste”, haktuir Zilman.

Nia akresenta, dau-daun Timor-Leste seidauk iha lei extradisaun no komisaun A ne’ebé maka trata asuntu konstitusional no justisa rasik seidauk iha planu, tanba lei refere Governu maka tenki halo uluk konkordansia ho nasaun sira, nune’e PN bele aprova, maibé lei extradisaun ne’e la fasíl atu halo.
“Ba ha’u lei ne’e la iha mos la iha buat ida, maibé importante ema ne’ebé komete kazu iha Timor labele sai ba vizita nasaun seluk”, relata Zilman.

Entretantu Xefi bankada UDT/FM ne’e sujere mós katak, karik ema ne’ebé maka deskonfia komete kazu ruma, bainhira atu ba rai liur, hanesan atu halo tratamentu saúde, tenki akompañia husi Polísia, atu nune’e sira labele hala’i sai husi prosesu justisa iha Timor-Leste. ety