Promete bonkar mafia iha justisa Cárceres : Tempu badak públiku sei hatene

Ministru Justisa, Manuel Cárceres iha loron 12 fulan Setembru nebe promete atu bonkar mafia nebe deskonfia mosu iha Sekretaria Estado Terras  no Propriendade nian, maibe besik semana tolu ona governante nee seidauk realiza ninia promesa nee ba publiku.

Iha loron Sesta ( 27/09) semana kotuk,  jornalista sira konfirma ba Ministru Justisa, konaba ninia promesa atu bonkar sai mafia iha Sekretaria Estadu Terras no Propriedade ba kazu disputa rai iha Kaitheu nian entre kompanhia China Harbour no kompanhia Marino Entreprise, maibe Ministru Justisa la fó esplikasaun detallu.

“Labele ansi, tanba nei-neik sei hatene mafiozu sira iha parte justisa nini’an, tempu badak públiku sei hatene, sé mak mafia iha parte justisa, nune’e to’o tempu ita boot sira sei hatene, ita labele la’o ansi demais, to’o nia loron ita boot sira sei hatene no sei fo sai ba públiku”, Governante ne’e hato’o hodi responde pergunta husi jornalista kona-bá ninia deklarasaun atu bongkar mafia iha setor justisa, bainhira partisipa iha serimónia lansamentu Legis PALOP+ TL, iha salaun Ministériu Justisa, foin la-lais ne’e.

Konaba Parlamentu Nasionál mós husu ba Ministru Justisa atu esklarese estatuto rai Kaitehu,maibé Ministru Justisa ne’e  hateten de’it, “ida ne’e ministru ho parlamentu,la’os ministru ho Jornalista”.

Disputa rai iha Kaitheu entre kompanhia Marino Entrepraise ho China Harbour hetan intervensaun husi Kay Rala Xanana Gusmão. Tanba lider nasional nee ba sobu lutu nebe kompanhia Marino Entreparise tau atu  Kompanhia China Harbour labele tama hodi produz raihenek  no dulas fatuk ba konstrusaun Portu Tibar nian.

Iha momentu Xanana Gusmão ba sobu lutu nebe kompanhia nasional tau nee, marka prezensa mos Ministru Justisa, maibe iha momentu neba governante nee lakohi fó komentariu ba media ba assuntu nee.

Maibe loron rua liu tiha Ministru Justisa fó sai deklarasaun ida katak rai iha Kaitheu nebe kompanhia rua halo problema nee deskonfia iha mafia balu iha laran nunee nia iha tempo badak atu bonkar sai maifia nee.Tos/Mya