OSF:Konfrontu akontese bei-beik tanba grupu organizadu hakarak estraga nasaun

Organizasaun Sagrada Família (OSF), konsidera, konfrontu entre joven sira ne’ebé sempre akontese bei-beik iha rai laran, ne’e mai husi grupu organizadu ne’ebé mak hakarak estraga nasaun. 

Fundadór Organizasaun Sagrada Família (OSF), Cornélio Gama L-7 fó sai deklarasaun ne’e hafoin halo abertura ba semináriu ho tema Unidade Nasionál Veteranus no Futuru Lideransa, ne’ebé organiza husi organizasaun rezistensia Sagrada Família, iha Sala Auditóriu Ministériu Solidade Sosiál no Inkluzaun Kaikoli, Díli, Sábadu (26 /10/2019).

Eis Komandante Rejiaun III ne’e mós esplika, Sagrada Família nu’udar organizasaun rezisténsia la konkorda mosu bei-beik  violénsia no konflitu iha rai laran maibé organizasaun nia hakarak mak dezenvolvimentu ba povu.

“Polítika ne’e hanesan ita lei dehan direitu, liberdade no demokrasia ne’e bele, maibe buat ida mosu tuda malu, baku malu, hirus malu no sunu malu; Ida ne’e mak sagrada família lakonkorda tanba terus ne’e husi povu sagrada família joven no kaixa klandestina, ita bo’ot sira ita terus ne’e tanba rai oan ida ne’e komesa mosu tan konflitus sira hakarak estraga nasaun, e ne’e mak ami sgrada família lakohi. Hanesan uluk iha ailaran, ami halo azitasaun para labele mosu konflitus entre joven ho povu, xefe suku, xefe povasaun, atu labele mosu tan ida ne’e. Ami sagrada família kopera ho F-FDTL no PNTL atu kontinua fó seguransa ba rai no nasaun ida ne’e,” hateten Fundadór Organizasaun Sagrada Família,  Cornelio Gama L-7.  

Semináriu ne’ebé organiza husi organizasaun sagrada família ne’e partisipa maxímu husi membru feto-mane hamutuk atus rua resin mai husi Munisípiu Viqueque no Díli.Ito