JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

MP-PNSIK destrói droga kilograma 3,253

MP-PNSIK destrói droga kilograma 3,253

Ministériu Públiku (MP) ho Polísia Nasionál Servisu Investigasaun Kriminál (PNSIK) destrói droga tipu metanfetamina ho kuantidade kilograma 3.253.

Atividade destroisaun droga ne’e hala’o iha Kinta (19/11/20) iha mortuáriu Hospital Nacional Guido Valadares (HNGV) nia kotuk, ne’ebé asiste diretamente husi Prokuradór Jerál Repúblika (PJR), José Ximenes.

Ho nune’e, PJR, hateten, droga ne’ebé mak destrói, tanba rezultadu operasaun konjunta envolve PNSIK no kuadru Prokuradór sira ne’ebé mak envolve iha prosesu inísiu no mós hetan tulun husi Polísia Sientífika Investigasaun Kriminál (PSIK).

“Atu konfirma sasan ne’e loos duni  droga, hanesan ita teste rápidu ne’ebé mak ita halo inísiu bainhira ita halo aprénsaun iha dia 14 Janeiru 2020. Atu hateten katak apezar prosesu ne’e rekursu hela, maibé ho ezame ne’ebé mak iha materia ne’e puru droga duni, entaun ita evita droga ne’e lakon, entaun ita deside destroisaun”, José Ximenes ba jornalista sira, hafoin destrói ai-moruk droga  iha HNGV.

PJR dehan tan, droga ida ne’e bele multiplika, mas bainhira merkadu eziste, joven sira bele sai hanesan alvu ba krime ida ne’e.

“Portantu atu hateten de’it krime sira hanesan ne’e ita tenke tau esforsu hamutuk, hanesan ami halo, MP, la’ós servisu mesak de’it, hamutuk ho órgaun Polísia Kriminál sira, ita halo esforsu hotu-hotu para oinsá deteta droga ne’e. Ita deteta mak ida ne’e, ita la hatene seluk ita labele deteta, tanba krime ne’e ho forma organizadu. Ohin ita destrói 3.253 mak ita destrói”, dehan José Ximenes.

Alende ne’e Prokuradóra da Repúblika, Lídia Soares, hateten, droga ne’e mai husi nasaun Nigéria, iha loron 17, fulan Dezembru, tinan 2019, liu husi Inglatera mai Bali-Indonézia, kontinua mai to’o Timor-Leste, iha loron 30, fulan Dezembru, tinan 2019, liu husi Aeroportu Internasionál Nicolau Lobato.

“Drogado sira uza kargu ne’ebé mak legalmente rejistadu wainhira ita deteta ita halo koordenasaun ho PNSIK ne’ebé mak sasan ne’e sira subar hela iha kompresór tuan nia-laran. Sasan ne’e ho nia kuantidade 3,253 kilograma, bainhira ita halo pasaje tetu ba ida ne’ebá ita halo nia tes pozitivu metafitamina sabu-sabu”, dehan Lídia.

Tanba ne’e, MP halo koordenasaun ho PSIK no parte kooperasaun internasionál.

“Hanesan ita hotu hatene ita laiha laboratóriu atu halo teste ba ida ne’e, entaun ita husu kooperasaun internasionál através husi PSIK no nia rezultadu mai konfirma nia teste katak, pozitivu metafitamina”, dehan Prokuradóra da Repúblika ne’e.

Iha sorin seluk, Komandante PNSIK, Superintendente Xefe Neto Mok, hateten, maske  PNTL mínimu  fasilidade, maibé konsege deteta droga tama iha Timor-Leste.

“Ha’u hakarak hateten ida ne’e mak ita-nia realidade, maibé ho realidade ida ne’e não quer dizer ita atu husik liu de’it, ita buka meius ho fasilidade ne’ebé mak mínimu, maibé ita konsege deteta. Husu ba Estadu atu tau ekipamentu ruma hodi deteta droga, no liu-liu ba anjing pelacak”, dehan Neto Mok.

Nune’e mós, Diretór Ezekutivu HNGV, Aniceto Cardoso, hateten, droga bele halo ema kontente, maibé bele estraga ema nia nia vida.

“Buat ida droga ne’e sé ita uza sala, la’ós de’it halo ita kontente, maibé nia kontente nia destroi-an hela dau-dauk, tanba nia afeta ba órgaun hotu-hotu”, dehan Diretór Ezekutivu HNGV ne’e.

Suspeitu ne’ebé envolve iha kazu droga ne’e, Timor-Oan ida no dau-daun ne’e kumpre ona pena prizaun, maibé sidadaun estránjeiru sei iha hela prosesu investigasaun, tanba sei iha estránjeiru.

Durante halo destroisaun ba droga ne’e, hetan seguransa husi PNTL, Batallaun Orden Públika (BOP). avi

Lee hotu :   MJ disponibiliza formação para guardas prisionais

Add to Comments Here!!!!

error: Content is protected.
Secured By miniOrange
You might also like:
FRETILIN ezije Governu ezonera Ilídio Ximenes

Xefe bankada FRETILIN, Francisco Miranda Branco,...

Diálogu ho PR, Autoridade Munisípiu Ermera preokupa ho folin kafé

Prezidente Repúblika (PR), Francisco Guterres “Lú...

Deskonfia selingkuh, laen ta’a nia fen-kaben

Polísia Nasionál Timor-Leste (PNTL) Eskuadra Cristo-Rei,...

Close