Deskonfia envolve kazu omisídiu iha Taibessi, TDD aplika aprezentasaun periódika ba JA

Tribunál Distritál Díli (TDD) liu husi prosesu Primeiru Interogatóriu (PI) aplika medida koasaun aprezentasaun periódika hasoru arguidu ho inisiál JA, tanba deskonfia envolve iha kazu omisídiu ne’ebé hamate vítima Ernesto dos Santos, nu’udár negosiante iha área merkadu Taibessi, munisípiu Díli, foin la-lais ne’e.

Defensór Públiku (DP), Afonso Gomes, hateten, tribunál aplika medida koasaun aprezentasaun periódika, tanba konsidera laiha prova ne’ebé sufisiente atu akuza arguidu ba prizaun preventiva.

“Tuir prova ne’ebé hato’o husi Ministériu Públiku (MP) hatudu laiha prova ne’ebé hatudu arguidu envolve diretamente iha kazu ne’e”, DP ne’e liu husi via telefone ho GMN, Kuarta (02/12/2020).

Iha faze alegasaun, MP alega arguidu ho prizaun preventiva no parte defeza husu aprezentasaun periódika, tanba arguidu la’ós autór prinsipál ba kazu ne’e.

MP akuza arguidu ho krime Omisídiu Simples, ne’ebé previstu no punidu iha artigu 138, Kódigu Penál Timor-Leste.

Audiénsia ba julgamentu ne’e prezide husi Juíza, Maria Solana, MP reprezenta husi prokuradóra, Bemvinda do Rosário, arguidu hetan asisténsia legal husi DP, Afonso Gomes.

Arguidu JA antes ne’e tenta hala’i husi área juridisaun Díli nian, nune’e Polísia Nasionál Timor-Leste halo kedas detensaun flagrante de litu no konsege kaptura arguidu iha área Tasi Tolu-Díli ho evidénsia balun. san