UPF kaptura abitante 30 tama ilegál husi fronteira terrestre

Porta Voz Polísia Nasionál Timor-Leste (PNTL), Superintendente Xefe Arnaldo Araújo, hateten, membru Unidade Polísia Fronteira (UPF), kaptura abitante 30, tanba tama ilegalmente liu hosi fronteira terrestre.

“Hahú  iha  loron 21 to’o loron 24, fulan ne’e, sira halo kapturasaun ba ema tama ilegál hosi fronteira terrestre tolu hanesan Oe-Cusse, Covalima no Bobonaro hamutuk ema 30, kompostu husi mane 17, feto 13, ema sira ne’e lokál hotu, sira ne’e oras ne’e dau-dauk iha ona kuarentena munisípiu ida-idak nian”, esplika Porta Voz PNTL ne’e ba jornalista sira iha Kuartel Polísia Caicoli-Díli, Segunda (25/01/2021).

Superintendente Xefe Arnaldo Araújo akresenta mós katak, hafoin ema sira  ne’e kumpre kuarentena durante loron 14, sei submete mós ba prosesu investigasaun.

Entretantu tuir Ministru Defeza (MD), Filomeno Paixão, iha pesoál balun husi instituisaun determinada mak fasilita ema tama ilegál husi liña fronteira.

Ho nune’e, Governante ne’e husu atu kria ekipa Task Force ne’ebé envolve ministériu hotu hodi kontrola di-di’ak liña fronteira sira atu bele halo seguransa ida sériu, labele hein de’it reforsu husi F-FDTL no PNTL. avi