PNTL: Abitante 17 tama ilegalmente mai TL

Porta Voz Polísia Nasionál Timor-Leste (PNTL), Superintendente Xefe, Arnaldo Araújo, hateten,  iha semana ne’e abitante 17 tama ilegalmente mai Timor-Leste (TL) liu hosi fronteira terrestre, Bobonaro no Covalima.

Arnaldo Araújo, hateten,  ema sira ne’ebé mak tama ilegál ne’e Polísia kaptura no hatama ona ba kuarentena durante loron 14, molok aprezenta ba Polísia, hodi detein iha sela durante oras 72 no submete ba prosesu investigasaun.

“Iha 10 de Fevereiro to’o 16 Fevereiro, movimentu ema tama ilegál hamutuk 17, ne’ebé ita dehan feto iha rua, ema estranjeiru ida no lokál ida, mane 15, ne’ebé agora dau-dauk sira iha kuarentena hotu, depois sira kompleta tiha 14 dias iha kuarentena, depois sira hetan fali prosesu  investigasaun iha Komandu PNTL munisípiu Bobonaro no Suai sei halo prosesu investigasaun ba sira”, Porta Voz PNTL ne’e ba GMN, Tersa (16/02/2021), iha Kuartel Jerál Caicoli-Díli.

Arnaldo akresenta, Komandu Jerál PNTL hasai ona orden hodi kontrola movimentu ilegál iha fronteira Bobonaro, Covalima no Rejiaun Administrativa Espesiál Oe-Cusse Ambeno (RAEOA), hodi hala’o prevensaun ba COVID-19.

“Agora dau-dauk Komandu hasai ona orden ba iha Komandu munisípiu Covalima no Bobonaro, inklui RAEOA, hodi hala’o patrullamentu ba movimentu ema tama-sai iha liña fronteira. Ne’ebé dala ida tan labele koko tama-sai iha liña fronteira”, dehan Porta Voz PNTL ne’e.

Antes ne’e mós, Governu bandu ona ema tama no sai iha munisípiu Bobonaro no Covalima, hodi bele hala’o prevensaun ba COVID-19. avi