TL lakon amigu bo’ot Kofi-Annan

Eis-Sekretáriu Jeral Nasoens Unidas, Kofi-Annan, husik ona mundu iha loron  Sabadu (18/08/2018) ho tinan 80. Saudozu Kofi Annan fila ba Aman Maromak nia kadunan Santo, husik hela nia kaben ho oan nain tolu.

Ho Kofi Annan nia mate ne’e, eis Prezidenti Repúblika, José Ramos Horta, hateten, Timor Leste lakon ona nia amigu bo’ot ida, tanba nia mak loke dalan ba Timor Leste atu luta hodi hetan referendu.

“Momentu Kofi Annan mate,  ha’u  hetan kedas kontaktu husi rai liur, tanba ha’u mós servisu hamutuk ho Kofi Annan kuaze tinan barak  nia laran, hahú iha tinan 2017 bolu ha’u sai Komisun Global luta kontra Droga, kofi Annan sai Prezidenti ha’u  sai Komisáriu. Durante semana rua-rua kontaktu malu bei-beik, maibé foin dadaun ha’u rona  nia moras loron ida ka rua hanesan ne’e, maibé iha Sabadu ne’e husi liur kontaktu ha’u ne’e, ha’u mós hakfodak oituan, tanba ema ne’e sei forti hela,”hateten Ramos Horta ba Jornalista sira, hafoin partisipa  aniversáriu FALINTIL iha Fatuhada Díli, Segunda (20/08).

Saudozu Kofi Annan simu kargu eleitu nu’udar Sekretáriu Jeral Nasoens Unidas iha tinan 1996, fulan  Dezembru,  no iha tinan 1997, fulan Janeiru,  Kofi Annan hanesan figura mundial ne’ebé famozu tebes, tanba iha momentu halo ninia diskursu ne’e hateten katak,  durante mandatu tinan 5 atu haree problema TL nian.

Husi nia diskursu ne’e, komesa dinamiza asaun diplomátiku ONU nian, tanba momentu ne’e antes Kofi Annan  asume kargu ne’e, nia servisu hamutuk ona ho  veteranu Portugal no Indonézia para buka dalan ida diak ba povu TL.

“Ne’e duni ha’u nu’udar amigu ne’ebé diak, hamutuk ho nia servisu iha tinan barak nia laran, ha’u senti triste,”katak Horta.aba