Sosa asaun ConocoPhillips-Shell, Xanana garante aumenta rendimentu ba fundu mina-rai

Reprezentante espesial Governu ba asuntu petróleu, Kay Rala Xanana Gusmão, garante katak, sosa asaun ConocoPhillips ho Shell sei aumenta rendimentu ba Fundu Mina-rai (FM) ne’ebé oras ne’e tun ona.

“Iha partidu ida fo hanoin tiha ona ba tribunal rekursu katak, buat ne´e inkonstituisional ka lae? Se tribunal rekursu mak dehan katak laiha dalan ne´e inkonstituisional, ha’u dehan thank you very much. tanba sa? tanba fundu minarai tun dadauk osan laiha atu selu sira taka tiha tribunais. Sosa asaun ConocoPhillips ho Shell ne´ebé governu sosa bele aumenta tan osan fundu mina-rai ne´ebé mak dadaun ne´e tun tiha ona”, afirma Kay Rala Xanana Gusmão, iha nia diskursu serimonia graduasaun mestradu UNPAZ ba dala tolu, iha Kampus UNPAZ, Sábadu (09/03/2019).

Lider karismátiku ne’e ho esperansa hateten, sosa asaun ConocoPhillips ho Shell sei fo benifisiu ba povu no nasaun Timor-Leste iha futuru.

“Ita komesa fa’an gas komesa iha tinan 2026, ha’u mak la hakarak sosa asoens ne´e husi ConocoPhillips ho Shell, bainhira ita fa’an gas ba mundu osan tama mai fundu petroleu bele selu ema sira ne´ebé ko´alia barak ne´e,” haktuir Xanana Gusmão,

Tamba tuir Xanana katak, atu dezenvolve seitor tolu ne´ebé importante hanesan seitor petroleu, agrikultura no turizmu, ne’ebé sai hanesan setor industrial luan.

Foin dadauk Partidu FRETILIN mak hatama pareser ida ba Tribunal atu husu fiskalizasaun abstrata ba Lei Atividade Petrolíferu.Aes