PN sei la ajenda servisu KIP ba plenária

Meza Parlamentu Nasionál (PN) sei la ajenda servisu Komisaun Inkeritu Parlamentar (KIP) ba plenaria, tanba relatoriu KIP seidauk aprovadu iha nivel komisaun.

Asuntu ne’e deklara husi prezidente parlamentu nasionál, Arão Noe hafoin sorumutu ho empreza PELICAN PARADISE iha uma fukun Parlamentu Nasionál kuarta (15/05/2019).

Ema númeru um iha orgaun lejislativa, Arão Noe afirma bazeia ba lei artigu 11 aleneia 4, parlamentu nasionál sei la ajenda servisu Komisaun Inkeritu Parlamentar (KIP) ba plenaria tanba relatoriu KIP seidauk iha aprovasaun  husi nivel komisaun.

Arão haktuir, nia mos simu ona karta husi Komisaun Inkeritu Parlamentar hafoin mandatu KIP remata iha loron 22 fulan Marsu liu ba.

“Konaba inkeritu parlamentar artigu 11 alena 4 hateten, kuandu komisaun la aprova nia relatoriu, prezidente komisaun haruka karta ba prezidente katak relatoriu KIP nian la aprovadu iha nivel komisaun, los duni to’o fim de mandatu sira aprezenta karta ida mai katak relatoriu KIP la konsege aprova, tanba ne’e laiha dalan ajenda ba plenaria, tanba normalmente ajenda ba plenaria ne’e, ba buat ne’ebe mak aprovadu iha nivel komisaun,” hateten Prezidente Parlamentu Nasionál, Arão Noe.

Prezidente Parlamentu Nasionál Arão Noe dejafia sosiedade, públiku no opozisaun atu halo keixa ba Ministériu Públiku no Komisaun Anti Korupsaun (CAC-Sigla Portugues) karik iha indisius ka iregularidade ruma akontese relasiona ho serivsu komisaun inkeritu parlamentar maibe labele halo akuzasaun falsu.

“Labele halo akuzasaun falsu, se karik prezidente la ajenda viola lei halo favor aprezenta artigu ne’e mai, depois mak ita análize hodi desidi, labele akuza deit sem hatudu faktus. Aktividades ne’e la’o tiha ona, sei labele devolve, ba se deit mak sente katak iha iregularidade ruma bele halo keixas, tanba ita nian estadu ne’e nakloke, ne’ebe bele hato’o keixa ba ministeriu públiku ka CAC,” hateten Prezidente Parlamentu Nasionál, Arão Noe.

Enkuantu antes ne’e bankada opozisaun FRETILIN deklara katak sei kontinua rekolla dadus Komisaun Inkeritu Parlamentar hodi aprezenta ba Ministeriu Públiku atu prosesa tuir justisa tanba konsidera deputadu sira husi bankada aliansa maioria parlamentar boikota relatoriu KIP hodi salva pesoal balu iha projetu. Ito