GREGÓRIO SALDANHA: JARDIN MOTAEL MERESE TAU NARAN SEBASTIÃO GOMES

Prezidente Komité 12 Novembru, Gregorio Saldanha, hateten, sira nia parte prefere Jardin Motael tau naran saudozu Sebastião Gomes, la’os tau fali naran Jardim 12 de Novembro Motael.

Gregório Saldanha hato’o kestaun ne’e, iha nia rezidénsia Bidau Díli, iha Domingo (08/9/19) ne’e.

Gregório Saldanha esplika, Jardin Motael merese tau saudozu Sebastião Gomes nia naran no Komité sei la muda nia opiniaun.

Tuir Gregório, 12 de Novembro mosu tanba halo protestu no fó solidariedade ba Sebastião Gomes iha momentu ne’ebá.

“Komité 12 de Novembro kontente kuandu naran 12 Novembru tau iha fatin ne’ebé deit, konkorda liu dezenvolvimentu atu la’o lalais, maibe di’ak liu ita iha koordenasaun atu labele hamosu dezintendimentu. Liga ho istória 12 Novembru nian, nia labele la’o ketak, harí jardin ida mak ita nega tiha faktus istória seluk, ne’e hanesan Sebastião Gomes, ne’e ofensas bo’ot ida ba ami no família, tanba ne’e mak komite 12 Novembru hamriik hateten katak, la konkorda ho jardim 12 Novembru Motael, e tuir ami hanoin katak merese liu tau naran Jardin Sebastião Gomes,” hateten Prezidente Komité 12 de Novembru, Gregório Saldanha.

Antes ne’e Ministériu Turizmu desidi ona Jardin Motael ne’e ho naran Jardim 12 de Novembro Motael, maibé Komité deskorda no prefere Jardin Sebastião Gomes.

Nune’e mós Diretór Jerál Ministériu Turízmu, José Quintas, klarifika ona katak, polémika ne’e akontese tanba falta koordenasaun maibé promete sei buka solusaun hamutuk ho komite 12 Novembru.

Jardin Motael rehabilita husi kompañia lokal Algis Unipessoal limitada liu husi tenderizasaun husi ministériu turízmu.

FRETILIN husu governu harii Monumentu 12 Novembru

Bankada Frente Revolucionário do Timor-Leste Independente (FRETILIN), husu ba governu atu harii monumentu 12 Novembru, hodi fó rekoñesementu ba joven sira ne’ebé sai vítima no lakon ona vida iha momentu ne’ebá.

“Há’u hanoin tempu to’o ona atu governu hari’i monumentu 12 Novembru, tanba ho situasaun ida ne’ebá drástiku, forsa okupante Indonesia oho ita nia joven sira, ita nia joven sira mak luta hasoru forsa Indonesia no dau-daun ne’e joven sira ne’ebé moris hetan formasaun no eskola, tanba ne’e presiza hari’I monumente ne’e”, dehan Vise Xefi bankada FRETILIN, Francisco Miranda Branco ba GMN foin la-lais ne’e, iha Parlamentu Nasional (PN).

Vise Xefi bankada FRETILIN ne’e esplika, presiza hari’i ona monumentu 12 Novembru, tanba dau-dauk ne’e sobrevivente sira hein hela governu atu konstrui, hodi fó onra ba sakrifisiu no vida ne’ebé joven sira oferese iha akontesimentu masakre 12 Novembru, tinan 1991.

“Ba ha’u 12 Novembru ne’e, sai propriedade Estadu Timor-Leste ni’an, di’ak liu tan ita koloka saudozu Sebastião no promove joven ida ne’ebé forsa okupante ou intelijen Indonesia tiru iha Motael-Díli, nune’e 12 Novembru sai propriedade Estadu ni’an, tanba governu promete kleur ona atu hari’i ou halo lansamentu fatuk dahuluk monumentu ba joven sira ne’ebé determinadu, lori sira nia hirus-matan hodi hasoru kilat musan”, subliña Branco.Ito/ety