Marí Alkatiri: Ha’u mak PR, fó ona pose ba membru governu pendente

Sekretáriu Jeral Partidu FRETILIN, Marí Alkatiri, hatete, nia mak Prezidente Repúblika (PR), nia fó ona tomada de posse ba membru Governu pendente hamutuk nain sia ne’ebé to’o agora atual Prezidente Repúblika, Francisco Guterres Lú Olo sei pendente hodi la fó pose.

“Ha’u mak prezidente fó ona pose ba membru Governu pendente”,dehan Alkatiri iha Bebora Díli, Tersa (23/09).

Alkatiri mos konsidera, eziste poder informal iha VIII Governu hodi manda orgaun Estadu. Maibé Alkatiri rejeita atu fó sai naran ema ne’ebé mak uza poder informal ne’e hodi manda Estadu. Tuir Alkatiri, lider AMP ne’ebé nia intende la inklui iha Prezidente Repúblika, membru governu ka iha Parlamentu Nasionál

“Durante ne’e poder informal  mak eziste iha Timor-Leste, tanba ema ida manda ne’e nia la tama iha orgaun soberanu haat, maibé nia mak manda fali orgaun soberanu haat  ne’e, ne’e mak dehan poder informal”, Mari Alkatiri hato’o lia hirak ne’e hafoin partisipa programa Grande entrevista iha Bebora Díli, Tersa (23/09), bainhira hatán pergunta jornalista nian kona-ba líder AMP ida ne’ebé mak uza poder informal manda Estadu.

Tanba ne’e, Alkatiri husu ba líder hotu atu hatene ida-idak nia kompetensia, hodi labele manda fali órgaun seluk nia servisu.

Lamenta ho desizaun PN

Alende ne’e, Sekretáriu Jeral, Marí Alkatiri, lamenta ho desizaun Parlamentu Nasional (PN), ne’ebé kansela viajen Prezidente Repúblika, Francisco Guterres Lú Olo nian ba rai liur.

“Ha’u lamenta tebes desizaun membru Parlamentu ne’ebé vota kontra hodi kansela tiha viajen Xefe Estadu nian ba rai liur, ida ne’e fó imajen ladun diak ba mundu, tuir los labele konfundi buat naksalak iha uma laran, hodi impede fali atividade sira seluk”, katak Alkatiri.

Antes ne’e sosiedade sivíl no estudante inklui públiku sira mós preokupa tebes ho  desizaun Parlamentu Nasional nian, hodi kansela viajen Prezidente Repúblika nian ba rai liur, no Parlamentu Nasional halo ona kanselamentu Xefe Estadu atu ba rai liur ne’e dala 5 ona. Maibe Parlamentu Nasional mos antes ne’e deklara ona katak, sira insisti kansela viajen PR Lú Olo nian ba rai liur atu hatete ba PR katak, problema iha rai-laran nia seidauk rezolve hanesan la fó pose ba membru Governu nain sia, la fó pose embaixadór sira, la presiza ba rai-liur to’o rezolve tiha problema hirak ne’e mak PR bele sai ba rai-liur, nune’e ema seluk bele reprezenta xefe Estadu ba koalia iha asembleia jeral ONU.aba