Atu redus proposta OJE 2020, VPPN Maria: Desizaun husi plenária

Vise  Prezidente  Parlamentu  Nasionál (VPPN), Maria   Angelina   Sarmento   Lopes,  hateten,  Parlamentu Nasionál (PN) kontinua debate proposta Orsamentu Jeral Estadu (OJE) 2019 ho montante billiaun USD 1.950, maibé atu halo redusaun ba OJE refere hein desizaun husi deputadu sira liu husi plenária.

“Ha’u  labele divulga iha ne’e, maibé depende ba iha desizaun husi plenária  tanba ne’e  la bele fó komentáriu uluk kona-ba asuntu refere,”dehan Maria Angelina,  ba Jornalista iha Parlamentu Nasionál Tersa (26-11-2019).

Reprezentante povu ne’e informa, kona-bá atu halo redusaun ba proposta  OJE  depende ba evolusaun  husi  debate    depois  maka   haree. Tanba  ne’e  PN   sei kontinua debate OJE 2020 ho billiaun USD 1.950, no durante debate maka sei haree atu halo redusaun ka mantein.

Antes ne’e, governu aprezenta ba Parlamentu Nasionál, proposta Orsamentu Jerál Estadu tinan 2020  ho montante billiaun USD 1.950. Maibé hafoin komisaun sira iha Parlamentu Nasionál  halo audiénsia ho Ministériu sira, deputadu PN sira halo kedas kritika hasoru tanba konsidera montante orsamentu boot tebes iha istória Timor nian .

Nune’e bankada apoiu Governu CNRT ameasa vota kontra ba orsamentu refere. 

Iha konferénsia nasionál Aliansa Mudansa ba Progressu (AMP) ba daruak nian deside governu sei halo redusaun ba proposta  orsamentu OJE tinan 2020, maibé la esplika detalla konaba númeru redusaun.

Atu halo redusaun ba orsamentu, Koordenador Konsellu diretiva AMP, Francisco Kalbuadi Lay, hateten, Primeiru Ministru (PM) Taur Matan Ruak hamutuk ho diretiva nasionál fó ona kna’ar ba Ministra Finansa interina hamutuk ho Parlamentu Nasionál atu hadi’a ho didi’ak.

Tuir kalendáriu, Parlamentu Nasionál (PN)  sei hahú debate   ba proposta Orsamentu Jeral Estadu  (OJE)   iha loron 2  fulan dezembru   no sei remata iha loron  14  fulan Dezembru, tinan ne’e.Fel