JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

Partidu nen asina akta koligasaun forma IX Governu ■Ramos Horta: Posibilidade Xanana asume kargu PM

Partidu nen asina akta koligasaun forma IX Governu ■Ramos Horta: Posibilidade Xanana asume kargu PM

Partidu 6 hanesan CNRT, KHUNTO, PD, PUDD, UDT, no Frenti Mudança, ofisialmente asina akta koligasaun, hodi forma IX Governu. Akordu ne’e asina iha Sede Partidu CNRT Bairo dos Grilhos Sábadu (22/02).

Tuir Prezidente Partidu CNRT, Kayrala Xanana Gusmão, partidu hirak ne’e, prontu hodi forma IX governu, no garante konjuntura governasaun foun, atu solusiona impase polítiku ne’ebé dura ona kuaze tinan 3.

 “Ida ne’e atu hatudu de’it katak, atu hatan ba impase ida ne’e, partidu neen, buka hasoru malun, tau hamutuk hanoin, tanba ne’e mak, sim ami prontu atu avansa ba forma governu foun”,hateten Xanana Gusmão ba jornalista sira liu husi konferensia ba imprensa.

Bainhira husu kona-bá lista membru CNRT, ne’ebé antes ne’e la hetan pose husi Prezidente Repúblika, karik partidu CNRT sei mantein lista hirak ne’e, Kay Rala  Xanana Gusmão hateten, sira seidauk to’o iha parte ne’e.

Antes ne’e, Prezidente Repúblika deklara ona, iha pontu importante tolu hodi hakotu impase mak, eleisaun antesipada núdar rekursu ikus liu, fó opsaun ba Partidu polítiku iha asentu parlamentar, hodi dezeña solusaun ba impase polítiku, no pontu ikus mak, Taur Matan Ruak kontinua mantein pozisaun nu’dár Primeiru Minisrtu, to’o governasaun foun mosu.

Koligasaun foun ba ho kompromisu ualu

Koligasaun foun ne’ebé  harii ona husi partidu CNRT, PD, KHUNTO, UDT, FM ho PUDD, sei ba ho kompromísu ualu iha Governasaun dasia ninian mak hanesan; 1. Kontinua implementa programa ne’ebé uluk VIII Governu hala’o ne’ebé bazeia ba iha Planu Estratéjiku Dezenvolvimentu (PED) 2030. 2. Tau-matan ba povu sira iha área rurál hodi hadi’a sira-nia moris. 3. Garante estabilidade nasionál ne’ebé hanesan fatór determinante ida ba dezenvolvimentu nasionál. 4. Kontinua hala’o negosiasaun fronteira terrestre no marítima ho Indonézia atu hetan solusaun ne’ebé justa ba iha delineasaun fronteira entre Timor-Leste ho Indonézia. 5. Kontinua tau-matan ba iha veteranu, idozu, defisiente no oan-ki’ak sira. 6. Kontinua hadi’a infraestrutura. 7. Hamutuk ho órgaun justisa sira kontinua reforma justisa hodi serbí di’akliu povu. 8. Promove nafatin boa governasaun.

Lee hotu :   PM Taur : Avaliasaun uluk ba membru Governu antes remodelasaun

Ramos Horta: Xanana sei asume kargu PM

Eis Prezidente Repúblika (PR), José Ramos Horta, hatete, Prezidente Partidu CNRT, Kay Rala Xanana Gusmão, sei ba asume kargu nu’udar Primeiru Ministru iha IX Governu.

Eis Prezidente Repúblika (PR), José Ramos Horta, deklara, nia parte prefere Prezidente partidu CNRT, Kay Rala Xanana Gusmão mak ba Primeiru Ministru iha IX Governu ne’e, hodi nune’e bele hakotu diskusaun Fronteira Terrestre (FT), tanba úniku Xanana de’it mak bele aguenta ho diplomásia Indonézia nian.

“Sim, sr. Xanana, ha’u mós hateten ona ba nia katak, ita mak tinan tolu ne’e tenke lidera ka’er governu ne’e, tenke ka’er metin ho ita nia autoridade esperiensia, ami hotu-hotu tane ita bo’ot (Xanana), para servisu ne’e la’o di’ak. Nia mak tenke ba duni (PM) todan ne’e, tanba nia iha ona esperiensia tinan 20 ona iha governu, iha prezidensia, internasionál, nia (Xanana) hatene ekonomia oinsa, ka’er problema bo’ot fronteira marítima no terrestre ho Indonézia. Tanba negosiasaun ho Indonézia ne’e la halimar, ha’u hatene di’ak, sira (Indonézia) nia diplomata ne’e matenek teb-tebes, no lubuk ida, ha’u so maun Xanana úniku bele aguenta ho sira (Indonézia), tanba Indonézia kuandu negósia, sira buka interesse sira nian, hanoin tanba ne’e di’ak liu maun Xanana mak ba, avaliasaun di’ak, tanba maun Xanana mós influensia, ema povu Indonézia ne’e respeitu nia, ne’e mak vantajen ida katak, maun Xanana mak tenke ka’er prosesu negosiasaun sira ne’e, tanba ema seluk difisíl, ha’u rasik de’it difisíl loos”, deklara Ramos Horta ba jornalista sira, hafoin akompaña assinatura akta koligasaun ba konjuntura formasaun governu foun, Sábadu (22/02/2020).

Lee hotu :   Semana oin, PR Lú Olo hasoru Xanana Gusmão

Laureadu nobel da paz ne’e sujere, nu’udar kompañeiru da luta, atu iha diálogu internal entre Prezidente Partidu CNRT, Kay Rala Xanana Gusmão ho Prezidente Repúblika, hodi diskute kona-bá lista kandidatura pendente sira, nune’e hakotu ona impasse polítiku ne’e.

“Maun bo’ot Xanana hanesan líder nasionál, ha’u fiar sei tuur hamutuk ho ita-nia PR hodi ko’alia didi’ak, para hetan dalan ne’ebé mak di’ak liu, PR mós hakarak estabilidade no dalan di’ak ba oin. Ha’u fi’ar iha tempu propriu sei hasoru PR, di’ak liu sira na’in rua (Xanana-Lú Olo) hasoru malu ko’alia mês-mesak, nu’udar kompañeiru luta armada, atu ko’alia didi’ak no haree tenke rona mós PR nia preokupasaun, problema uluk (Pendente lista) ne’e, tanba PR mós fuan kanek, tanba uluk kona-bá posse ne’e, derepente de’it ne’e sai iha média, la’os sai husi gabinete prezidensial mak tau iha média, entaun sai ona iha média, difisíl ona atu hamaus malu, ne’eduni di’ak liu sira ko’alia hamutuk”, rekomenda Horta.

Líder nasionál ne’e mós apresia ho Prezidente CNRT ne’ebé konvoka koligasaun ho partidu polítiku sira seluk.

“Hau fó parabéns ba maun bo’ot Xanana, ho Prezidente no Sekjer partidu hotu-hotu ne’ebé mak iha koligasaun foun ne’e, sira rona mensajen no apelu mai husi PR, para ko’alia halo diálogu, hotu-hotu halo, inklui FRETILIN ho PLP mós buka dalan, nune’e CNRT ho sira seluk mós buka dalan, dalan sira hetan mak ida ne’e, ho maioria iha Parlamentu, garante 34, hanesan maun bo’ot mós hateten, servisu ho umildade para serví povu, servisu ho didi’ak no servisu maka’as, no buka lor-loron hadi’a ba oin, ha’u fi’ar governu ne’e bele kumpri nia mandatu to’o 2023, no hadi’ak buat ne’ebé tenke hadi’a, ne’ebé mak di’ak ona kontinua. Ha’u buka ajuda de’it iha kotuk hanesan eis PR, maibé hau laiha papel ofisial institusional ida, respeita maun bo’ot Xanana buka tulun nia, maibé respeita mós maun bo’ot Marí Alkatiri, kontinua kontaktu ho nia, nia (Marí) rasik hateten ona katak, hakarak biaviliza, no hakarak diálogu para orsamentu ne’e bele hadi’a no la’o ba oin”, tenik José.

Lee hotu :   PM Taur: PR hakarak TC ho PN maka kontrola FP ■ Arão konsidera PR veta polítika ba LAP

Maske nune’e, Horta mós subliña, bainhira Xanana presiza apoiu, nia parte prontu hodi fó apoiu nu’udar eis Prezidente Repúblika.

“Buat ne’ebé maun bo’ot Xanana presiza bolu, ha’u ba,  Dr. Marí no PR bolu mós ha’u sempre prontu, informal husi kotuk, ne’e mak dalaruma ita bolu majistratura influensia karik, buat ne’ebé ita presiza PR presiza halo buat ruma iha laran ka liur, ha’u kolabora nune’e de’it,  lalika fila-fali ba instituisaun Estadu”, realsa diplomata ne’e.

Entertantu, koligasaun foun entre partidu CNRT,PD Khunto, PUDD, Frente-Mudansa ho UDT ne’e rasik asina ona akta hodi formaliza nia koligasaun atu hakat ba konjuntura polítika iha formasaun governu foun, hodi hakotu impasse polítiku ne’ebé Timor-Leste hasoru. Ana/say

Add to Comments Here!!!!

error: Content is protected.
Secured By miniOrange
You might also like:
PR Lú Olo: Problema iha TL sempre hetan solusaun

Prezidente Repúblika, Francisco Guterres Lú Olo,...

PR Lú Olo apoia ParPol sira forma Governu foun

Prezidente Repúblika Francisco Guterres Lú Olo,...

Diskute dezenvolvimentu nasionál, Xanana: Joven sira labele lori partidu nia naran

Eis Prezidente Repúblika, Kay Rala  Xanana...

Close