JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

Hadau kadeira PPN, FRETILIN fase liman hodi fó kulpa ba CNRT

Hadau kadeira PPN, FRETILIN fase liman hodi fó kulpa ba CNRT

Reprezentante povu iha uma fukun Parlamentu Nasionál (PN), liu-liu bankada CNRT konsidera bankada FRETILIN fase liman hafoin halo asaltu poder ba meja PN no atu fó fali kulpa ba CNRT ne’ebé evita nasaun monu ba golpe Estadu.

Tanba hafoin mosu dezintendimentu iha PN, deputadu husi bankada CNRT hamutuk ho ninia aliadu aujente iha plenária ne’ebé lidera husi Prezidente PN, Aniceto Guterres, ne’ebé eleitu ho votus a favor 40.

Maibé razaun aujentu iha plenária, ne’e tanba sei hein desizaun husi Tribunál Rekursu (TR) pedidu fiskalizasaun abstrata konstitusionalidade  kona-bá destituisaun eis Prezidente PN, Arão Noe.

“CNRT ho líder maun boot Kay Rala Xanana Gusmão, hatuur metin no defende Estadu Direitu Demokrátiku katak, kualker asaun polítika sira tenke bazeia ba konstituisaun no lei odinária sira no CNRT sei hamri’ik no tuba iha primeira liña, hodi la-admite no la-tolera kualker aktu polítika sira ne’ebé hakarak lejitima komportamentu polítika sira ne’ebé realiza ho forma tácito no expresa hodi viola norma konstitusionál. La’ós retórika, bankada CNRT hatudu duni ninia maturidade no konsiénsia polítika iha PN durante ne’e, ita hotu sei lembra no sei freska hela iha ita hotu nia memoria institusionál PN”, Deputadu bankada CNRT, Gabriel Soares, liu husi ninia deklarasaun polítika  iha PN, Tersa (02-06-2020).

Nia subliña, iha tinan 2017, Prezidente PN ilegál atuál, deputadu Aniceto blokeia totál PN, maske CNRT ho ninia koligasaun sira iha maioria ho kadeira 35, maibé konstituisaun no rejimentu PN, tanba ne’e deputadu CNRT, PLP no KHUNTO, iha momentu ne’ebá ho sira-nia konviksaun la halo ka la realiza asaun hada’u no asaltu poder ba meza PN.

Lee hotu :   Motorista transporte públiku sei hetan benefísiu dala 3 husi Governu

“Bankada CNRT hakfodak no lamenta tebes ho bankada PLP no KHUNTO ne’ebé uluk iha tinan 2017 respeita no kaer metin regra konstitusionál, legais no rejimentais, iha loron 18-19, fulan Maiu, tinan 2020, nakfilak-an ho hahalok inkonstitusionál no ilegal iha povu nia matan laran, tanba hakarak alkansa poder polítiku. Ida ne’e hatudu katak, bainhira ita hamutuk ho ema di’ak mak ita sei hatudu hahalok di’ak, maibé bainhira ita hamutuk ho ema la di’ak mak ita sei hatudu hahalok la di’ak ”, tenik Gabriel.

Hatán ba kestaun ne’e, Vise Xefe bankada FRETILIN, Antoninho Bianco,   rejeita deklarasaun polítika husi bankada CNRT no konsidera bankada FRETILIN hamutuk ho PLP no KHUNTO atu viabiliza Governu, la’ós atu halo golpe.

“Sé ita boot sira mak atu hatún Governu ne’e mak golpe do Estado no Governu ne’ebé liafuan ne’ebé mak ita boot sira hasa’i, ne’e husu ba imi ni’an, ami la hada’u poder, ita boot sira golpe Estadu, PN laiha golpe Estadu, artigu 92 konstituisaun hateten, poder PN mak lejislativu, halo fiskalizasaun no desizaun polítiku to’o agora nein órgaun soberanu ida hada’u poder tolu ne’e, asaltu poder iha ne’ebé, poder PN nunka iha asaltu poder, sá tan PN nia poder iha PN“, dehan Antoninho.

Tuir deputadu KHUNTO, Luis Roberto, konsidera bankada CNRT la merese hasa’i liafuan hadau poder no golpista atu ko’alia iha sala plenária, tanba agora la’ós ona tempu atu halo funu, maibé atu ko’alia kona-bá dezenvolvimentu ba nasaun.

“Ita hala’i fali artigu 69 separasaun de poder órgaun hat ne’ebé estabelese iha nasaun Timor-Leste ita hotu no ida-idak nia papel no kompeténsia, ha’u fiar katak saída mak órgaun soberanu halo mós bazeia ba rejimentu PN, ne’ebé sai matadalan ba ita durante ne’e, ha’u diskordu Vise PN (ami na’in rua-red) obriga-an hodi hada’u poder“, tenik Luis.

Lee hotu :   PJR rekoñese notifikasaun ba Kalbuadi Lay la tuir lei ■FRETILIN:Karta Xanana ba PJR hanesan presaun

Entretantu, iha loron 18 no 19 mosu dezintendimentu iha PN, tanba eis Prezidente PN, Arão Noe, lakohi realiza plenária, hodi diskute pedidu destituisaun, hafoin ne’e bankada FRETILIN, PLP no KHUNTO konvoka eleisaun, hodi hili Prezidente PN, Aniceto Guterres, ho votus a favor  40. ety

Add to Comments Here!!!!

error: Content is protected.
Secured By miniOrange
You might also like:
Deolindo dos Santos: Juiz sira hala’o julgamentu kumpre konstituisaun no lei

Prezidente Tribunal Rekursu (TR), Deolindo dos...

PM Taur husu parseiru sira fó prioridade ba dezenvolvimentu TL

Primeiru Ministru (PM), Taur Matan Ruak,...

Organizasaun KBK halo asaun karidade ba família 76 iha Taibesi

Organizasaun Kaben Na’in ba Kristu (KBK), Parókia Nossa Senhora Imaculada...

Close