PM Taur: Semana oin aprezenta jornada OJE 2021

Primeriu Ministru (PM), Taur Matan Ruak, deklara, Tersa (4/7/2020), ekipa rekuperasaun ekonomika sei aprezenta preliminar jornada Orsamentu Jeral Estadu (OJE) tinan 2021 ba membru Governu sira, hafoin iha Kuarta (5/7/2020) sei halo ba jornada orsamentu.

“Agora ami seidauk deside kona-ba tetu, maibé jornada orsamentu sei halo iha Tersa loron 4, hodi haree ideia jerál kona-ba prioridade saida mak ita hili ba tinan 2021 no kona-ba tetu depois sei deside, ita kria grupu ida atu prepara planu, rekoperasaun ekonomika ba kresimentu ita ni’an, ne’ebé lidera husi ekonomista Timor-Oan ida doutor Rui Gomes”, dehan Xefe Governu, Taur Matan Ruak ba jornalista sira, Kinta (30/07/2020), iha Palásiu Prezidensial, Nicolau Lobato, Bairo Píte, Díli.

Primeriu Ministru ne’e subliña, nia  fo ideia ida iha tinan 2021 saida mak  hanoin atu halo, para depois  haree nia kustu ne’e hira, tanba momentu ne’eba sei hatene prioridade ne’e saida, sei hili atu investe, naturalmente foku liu ba empregu no rekuperasaun ekonomia.

“Agora ita simu informasaun mai husi Banku Mundial no Banku Sentral, katak ita iha kresimentu negativu, hanesan 2017-2018 kresimentu ekonómika negativu, agora ita-nia esforsu oinsa mak bele hasa’e fali kresimentu ekonómiku, hasa’e entaun tenke halo investimentu”, tenik Taur. Oly