JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

CNRT–PD la partisipa serimónia hatur fali meza PN

CNRT–PD la partisipa serimónia hatur fali meza PN

Reprezentante povu iha uma fukun Parlamentu Nasionál (PN) husi bankada CNRT, PD no UDT/FM la partisipa iha serimónia kultura hatur fali meza Prezidente PN ne’ebé antes ne’e hetan estragus husi deputadu sira.

Tuir Koordenadór Lia-Na’in Sekretaria Estadu Arte no Kultura (SEAK), Eugenio Sarmento, antes ne’e SEAK nia parte hanoin deputadu hotu-hotu sei partisipa iha serimónia kulturál hatur fali meza PN ne’e, maibé realidade partisipa de’it husi bankada Governu, nune’e tuir SEAK nia haree sei fó impaktu iha futuru.

“Iha inísiu enkontru ami hanoin katak ho serimónia rituál ne’e mak sira bele hamutuk, maibé iha últimu dia ami rona la hamutuk buat hotu preparadu, ami la iha kbi’it atu dehan tanba saída. Ha’u hanoin haree husi prespektiva husi ami-nia, husi lia-na’in hotu-hotu sei fó impaktu ba futuru, tanba ita nafatin seidauk entende malu ho di’ak”, Koordenadór Lia-Na’in SEAK ne’e ba jornalista sira hafoin organiza serimónia rituál iha PN, Sesta (04-09-2020).

Eugenio esplika, kona-bá rezulta di’ak serimónia kultura ne’e di’ak ou la’e ne’e nu’udár Koordenadór laiha kompeténsia, tanba lia-na’in sira ida-idak halo interpretasaun tuir ida-idak nia kultura.

“Antes ida ne’e atu dehan katak, mezmu ho kondisaun ida ne’e, maibé importante ita hahú halo buat di’ak ruma, fanun ita-nia na’i-ulun sira atu rona malu ba oin“, dehan Koordenadór Lia-Na’in SEAK ne’e.

Nune’e Xefe Bankada CNRT, Duarte Nunes, klarifika razaun CNRT la  partisipa iha prosesu serimónia kulturál hatur fali meza PN ne’e, tanba  CNRT hakarak buka uluk fukun husi meza baku fila ne’e.

“Ami hola desizaun la partisipa ne’e problema ami-ni’an ho situasaun ida ne’e la’ós problema kultura ka relijiaun, maibé problema konstituisaun ita la kumpre lei konstituisaun mós ita la kumpre ami sei la simu asaun saída de’it mak sira halo, ami la fiar sira, maske bele halo buat, maibé tenke kumpre konstituisaun, sé la kumpre konstituisaun no la kumpre lei ba ami ida ne’e laiha valor. Kona-bá lejitimidade la’ós husu ba CNRT, maibé husu ba leten aas ba mak hatene ida ne’e, lejítimu ou la’e, maibé tuir CNRT laiha valór. Meza baku fila iha PN, tanba la kumpre konstituisaun no regra sira halo prosesu la tuir dalan CNRT la partisipa, tanba asaun sira ne’e laiha valor. Ita harii nasaun ida ita nia aliserse mak konstituisaun ne’e mak ukun, ukun ne’e bazeia konstituisaun, ne’ebé ita hotu hakarak no ita hotu harii Xefe Estadu mak asina konstituisaun. Maske la partisipa ka la’o ba oin ita semo de’it mós ita la’o di’ak hela tuir sira la’o, maibé ba ami buat ne’ebé sira halo laiha valor”, tenik Xefe Bankada CNRT ne’e.

Lee hotu :   PN apela ba sidadaun hotu refleta passadu no projeta ba futuru

Nia subliña mós katak, atu rezolve situasaun ne’e tenke kumpre konstituisaun, dalan mak eleisaun antesipada, tenke fó fali ba povu.

Nune’e mós tuir deputadu bankada PD, António da Conceição “Kalohan”, informal, bankada PD la partisipa iha prosesu serimónia rituál ne’e, tanba iha tempu resesu deputadu sira hala’o hela aktividade partidu ni’an iha munisípiu.

“Kestaun ohin hatur meza ni’an ami hanoin karik iha serimónia polítiku ida ami hotu bele partisipa, maibé ligadu ba kulturál Timor hala’o serimónia kulturál tenke kore nia fukun, tanba ne’e ha’u sente ha’u mesak laiha biban, tanba ne’e ami ami labele partisipa. Prosesu kulturál hatur hikas meza Parlamentu foun ne’e nia rezolve duni ou la’e, maibé la hatene, tanba akompañia de’it iha televizaun, maske iha reuniaun líder bankada Prezidente PN, Aniceto Guterres hanoin lori PN atu husu deskulpa ba povu, maibé seidauk iha, parese sei hato’o iha selebrasaun misa lokraik ni’an. Ha’u labele halo komentáriu ho situasuan ida ne’e, importante ita hotu atu reflete ita koalia kona-bá kore fukun, PN hanesan órgaun soberanu ida, buat ita koalia kona-bá lei, konstituisaun no prosedimentu sira, ne’ebé nasaun tenke hala’o tuir la’ós problema kultura”, dehan Kalohan.

Tuir Prezidente PN, Aniceto Guterres, deputadu husi bankada sira atu partisipa ou la’e, PN no Estadu ida ne’e tenke la’o ba oin.

“PN tenke la’o atu mai ka la mai PN tenke la’o nafatin no funsiona nafatin para Estadu ne’e mós la’o nafatin ba oin labele paradu“, tenik Xefe Órgaun Lejislativu ne’e.

Serimónia prosesu kulturál atu hatur hikas meza prezidensia PN foun ne’e, lia-na’in sira mai husi ponta leste, sentral no Oeste, lia-na’in hirak ne’e hamulak hahú husi lia-na’in parte sentral Díli no taka husi lia-na’in sira husi suku Tapo-Bobonaro.

Lee hotu :   Tempu la to’o responde preokupasaun deputadu

Serimónia ne’e partisipa husi Ministru Administrasaun Estatal (MAE), Ministru Asuntu Parlamentár no Komunikasaun no mós deputadu sira husi bankada Governu.

Meza PN nian ne’e deputadu sira baku fila tiha hafoin deputadu sira haksesuk kona-ba mundansa estrutura PN, iha loron 19, fulan Maiu, tinan 2020 ne’e. ety

Add to Comments Here!!!!

error: Content is protected.
Secured By miniOrange
You might also like:
KM aprova projetu rezolusaun nomea membru Konsellu Administrasaun ANATL

Konsellu Ministru (KM), Kuarta (03/09/2020), aprova...

PN husu Governu renova pasaporte estudante iha rai-liur

Xefe bankada PD, deputadu António da...

Faustino: F-FDTL fo apoiu ba servisu PNTL nian

Komandante Jeral Polisia Nasional Timor Leste...

Close