JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

Konsidera viola KRDTL, CNRT lakohi rona diskursu PR Lú Olo

Konsidera viola KRDTL, CNRT lakohi rona diskursu PR Lú Olo

Deputadu bankada CNRT iha Parlamentu Nasional (PN), Tersa (15/9/2020), walk out husi plenária sesaun III lejislativa ba kinta lejislatura ninian, tanba baruk no lakohi rona ona diskursu Prezidente Repúblika (PR), Francisco Guterres Lú Olo, ne’ebé halo violasaun ba Konstituisaun Repúblika Demokrátika Timor-Leste (KRDTL) nian momoos deit.

Vise Prezidente bankada CNRT, Patrocínio Fernandes, deklara, prátika inkonstitusionál sira ne’ebé Bankada CNRT deskreve, hatudu katak Timor-Leste nu’udár Estadu Direitu Demokrátiku marka pasu ba kotuk, tanba Konstituisaun RDTL hanesan matan dalan, ran, no klamar Estadu nian lakon tiha ninia valór.

“PR Lu Olo, ne’ebé mós de faktu kontinua asume kargu hanesan Prezidente partidu Fretilin, hili halo violasaun ba Konstituisaun RDTL tanba hakarak asegura inkluzaun partidu Fretilin nian iha Governasaun. Iha loron 19, fulan Maiu, tinan 2020, Povu tomak Timor-Leste nian, reprezentante komunidade internasionál iha rai laran, no mundu tomak akompaña, oinsá violasaun Konstituisaun ne’ebé mosu iha Presidénsia da Repúblika da’et to’o iha Parlamentu Nasionál. Konstituisaun RDTL, artigu 86 (al.f), hateten katak, iha loron neen-nulu, bainhira laiha formasaun Governu, ka, laiha aprovasaun Orsamentu Jerál Estadu, Presidente bele disolve Parlamentu Nasionál. Maibé, Loron 19 Maiu 2020 hanesan trajédia kontra demokrasia iha Timor-Leste, tanba, liu tiha loron 120 husi prazu konstitusionál loron neen-nulu ne’ebé termina iha 17 Marsu 2020, Bankada Fretilin, PLP, no KHUNTO, halo Golpe do Estado hodi hadau podér Meza Parlamentu Nasionál nian, maski asaun sira ne’e kontra Konstituisaun RDTL, artigu 99 (n. 3), Lei Organizasaun Funsionamentu Parlamentu, ka LOFAP, no Rejimentu Parlamentu Nasionál. Irónia bo’ot liu maka iha duni loron 20 Maiu 2020, Presidente Repúblika dekreta katak kontinua fó-apoiu ba VIII Governu, tanba Bankada tolu konsege hadau ona meza Prezidente Parlamentu Nasionál nian,” subliña deputadu Patrocínio Fernandes ba plenária Parlamentu Nasional, Tersa (15/9/2020).

Lee hotu :   KM aprova ona kuadru kooperasaun ba dezenvolvimentu sustentavel

Povu Timor-Leste tomak sai sasin oinsá prosesu sira ne’ebé tuir korredór Konstituisaun nian ne’e, Presidente Repúblika no Presidente Partidu Fretilín Francisco Guterres Lu Olo “Estuda lai, Estuda lai, Estuda lai,” maibé prosesu sira ne’ebé sees husi Konstituisaun RDTL ne’e, Prezidente Repúblika la-estuda maibé aprova no dekreta lalais de’it.

Bankada CNRT walk out iha sesaun solene ne’e, hafoin halo intervensaun polítika bankada nian.

Vise Xefe bankada CNRT, Patrocínio Fernandes mos justifika tan katak, bankada CNRT deside walk out hosi plenária, tanba konsidera kompozisaun meza Parlamentu ho konjuntura Governu foun inkonstitusionál.

“Ami tama tanba ami hakarak atu aproveita hodi hato’o kedas ami nia pozisaun ba Prezidente Repúblika atu rona direta, liga ho asuntus legalidade iha ita nia país, tanba nasaun demokrátiku ida ne’ebé iha lei nia okos. Ita labele harí Estadu ida ne’ebé mak sosa ona ho ruin no ran, ho interese ema ida rua nian ba poder, depois ita sama hotu lei ne’ebé hanesan mata dalan ba nasaun ida ne’e, tanba ne’e mak ami hanoin katak ami la presiza túr iha laran para legaliza fali sesaun ida ne’ebé mak ba ami laiha nia valor legalidade ninian”, Deputadu Patrocinío Fernandes, deklara razaun ne’e ba Jornalista sira iha PN, Tersa (15/09/2020) hafoin wolk out.

Bankada CNRT konsidera katak VIII Governu ne’e konstitusionálmente la ejiste ona, tanba tuir Konstituisaun RDTL, artigu 86 (al.f), tuir lolós Bloku Entendimentu tenke harii IX Governu, iha prazu loron 60 nia laran, sura husi loron 17 Janeiru 2020 to’o 17 Marsu 2020.

“VIII Governu ida ne’e laiha lejitimidade konstitusional, tanba ninia ezisténsia kontra Konstituisaun RDTL, artigu 106 (n.1), no kontra artigu 86 (al.f). Laiha artigu ruma iha Konstituisaun RDTL ne’ebé permite atu Primeiru Ministru ida ne’ebé hatama ona ninia pedidu demisaun, liu tiha loron 40 bele retira fali ninia pedidu ne’e. Situasaun ida ne’e nunka akontese iha países demokrátiku sira iha mundu, só bele akontese de’it iha Timor Leste, liu hosi dalan violasaun ba Konstituisaun RDTL. Laiha mós Artigu ruma iha Konstituisaun RDTL nebé permiteAjustamentu ba Governu ida ne’ebé forma husi Koligasaun, ne’ebé naksobu tiha ona prátika ida ne’e hatudu violasaun grave ba Konstituisaun RDTL”, afirma deputadu Patrocínio.

Lee hotu :   Veteranu sira husu PR Lú Olo hakotu impase polítiku ho imparsial

CNRT konsidera mós, iha rejime duodésimu estraordináriu no mós violasaun ba Konstituisaun ida ne’e sei kontinua da’et ba VIII Governu nia planu atu aprezenta OJE 2020, tanba konstitusionalmente, VIII Governu ne’e laiha programa bainhira Aliansa Mudansa Progresu (AMP) mate no hakoi ona.

“Bankada CNRT mós konsidera katak tuir Konstituisaun RDTL, Artigu 86 (al. f), Governu foun nebé forma ona, iha prazu loron 60 nia laran, sura husi loron 17 Janeiru 2020 to’o 17 Marsu 2020 tenke aprezenta Orsamentu Jeral do Estadu no hetan aprovasaun husi Parlamentu Nasional. Na realidade, para alénde laiha dalan tuir Konstituisaun RDTL atu VIII Governu mantein, liu hosi estrutura foun “tonka” no governu ida-ne’e mós viola tiha ona prazu konstitusional atu aprezenta Orsamentu Jeral Estadu ba Parlamentu Nasional”, hateten deputadu Patrocinío.

Relasiona ho walk out no deklarasaun bankada CNRT ne’e, bankada FRETILIN konsidera CNRT halo polítika hanesan ma fé ne’ebé tenta atu sobu estabilidade governativa ho polítika ma fé.

“Sira halimar ho polítika ida ne’e, maibe ita labele deakredita, labele hasai fiar hosi ita nia órgaun Estadu nian, hanesan halo atuasaun sistemátika, atu ema labele fiar ba ita nia Tribunal no PR, atu ema la fiar ba ita nia PN, ne’e sistemátikamente atu sobu ita nia Estadu, ne’e polítika ida mafé, kuandu ema la fó fiar ona ba ita, ita hateten buat hotu la di’ak, ita fó sala ba Tribunal, PN ho PR ida ne’e laloos”, afirma xefe bankada Fretilin, Francisco Miranda Branco.

“Ita tenke konsolida ita nia Estadu no fortifika ita nia órgaun soberania sira, polítika ita bele halo, maibe ita tenke tau aas intesere estadu nian, iha momentu konstrusaun Estadu ne’e, ita tenke fortifika liu tan, hametin liutan ita nia órgaun soberania sira.

Lee hotu :   MNEK reprezenta PR partisipa simeira ONU ba 74 ■Mensajen PR fo énfaze ba edukasaun

Entretantu, sesaun solene abertura legislativa datoluk ba kinta lejislatura ne’e, abertura hosi Prezidente Repúblika,  Francisco Guterres Lú Olo, maibe deputadu sira balun la marka prezensa iha sesaun solene ne’e. Say

Add to Comments Here!!!!

error: Content is protected.
Secured By miniOrange
You might also like:
Alfándega prende tua-manas kontentór lima iha Portu Díli

Durante Estadu Emerjénsia (EE) servisu Alfándega,...

Tera Mau Bulak prefere Governu harii sede KKLN iha Camp Phoenix Caicoli

Veteranu Antonio da Costa Silva ‘Tera...

Ekipamentu la sufisiente, Bombeirus difísil halo intervensaun ba inséndiu

Sekretáriu Estadu Protesaun Sivíl (SEPS), Joaquim...

Close