Fornesimentu internet ilegál fó impaktu ba reseita Estadu

Prezidente Komisaun C Parlamentu Nasionál (PN), Maria Angélica dos Reis, informa, kazu fornesimentu internet ilegál husi Indonézia mai Timor-Leste ne’e fó impaktu ba reseita Estadu.

“Ha’u mós akompañia notísia, ha’u seidauk bele dehan ne’e loos ou la’e,  maibé órgaun seluk nia kapasidade atu haree ida ne’e, ita haree em termus globál de’it sei iha ligasaun ilegál, signifika fó impaktu ba ita-nia reseita. Tuir loloos ita bele kobra reseita barak, tanba ilegál orsamentu la tama iha kofre Estadu, maibé ba fali fatin seluk ida. Espera autoridade kompetente haree kestaun ne’e tuir legál“, Deputada bankada FRETILIN ne’e ba jornalista sira iha PN, Sesta (27-11-2020).

Maria Angélica akresenta, maske nune’e Timor-Leste la’ós iha de’it operadór Telemor, maibé iha mós operadór Timor Telecom (TT) ho Telkomcel ladún fó impaktu ba sitema iha Timor-Leste.

“Ami hanesan ema polítika sente triste, ami fó kompeténsia tomak ba órgaun ne’ebé iha kompeténsia atu haree ida ne’e, sé mak iha kotuk ita tuir prosesu tiha lai”, tenik nia.

Antes ne’e, servisu investigasaun kriminál sobu liña koneksaun internet ilegál ne’ebé fornese husi  kompañia  PT. NAP Atambua-Indonézia ba kompañia Elite Computer iha Díli, liu husi tore Telemor iha postu administrativu Balibo, munisípiu Bobonaro, hodi fornese internet ba Ministériu balun no Komando Jerál PNTL. ety