JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

Governu la sériu dada kadoras GS mai TL

Governu la sériu dada kadoras GS mai TL

Vise Xefe bankada CNRT, Patrocínio Fernandes, hateten, Oitavu Governu ne’ebé lidera husi Primeiru Ministru (PM), Taur Matan Ruak, laiha seriedade atu dada kadoras Greater Sunrise (GS) mai investe iha Timor-Leste, hodi fó servisu ba Timor-oan sira hotu.

Deputadu oposizaun ne’e afirma, argumentu ne’ebé Governu aprezenta durante ne’e hanesan pozisaun ida ne’ebé Governu foti, hodi lakohi kontinua polítika dada kadoras ne’e mai Timor-Leste.

“Agora Ministru sira husi FRETILIN, inklui Prezidente Timor GAP buka razaun oin-oin hodi desmantela pozisaun Timor-Leste atu dada Kadoras GS mai iha Timor-Leste. Sira kontra de’it sein aprezenta estudu foun ida hodi justifika sira-nia razaun labele lori kadoras mai iha Timor-Leste”, Vise Xefe bankada CNRT ne’e liu husi konferénsia imprensa, Kuarta (18/11/2020).

Bankada CNRT lamenta ho pozisaun Governu nian dada kadoras GS ne’ebé sai tiha la klaru.

“Timor-Leste iha pozisaun ne’ebé seguru liu agora atu dada Kadoras GS mai iha Timor-Leste, tanba depois de Timor-Leste iha Fronteira Marítima (FM) permanente ho Austrália, maioria Kampu GS lokaliza (túr) iha área Tasi Timor-Leste nian. Pozisaun seguru mós haree husi partisipasaun asõens Timor GAP E.P. nian iha Join Venture; Timor GAP iha 56.56%, Woodside Energy 33.44% (Operator), Osaka Gas 10%. Ida-ne’e hatudu forsa boot Timor-Leste atu halo desizaun iha Komisaun Join Venture nia laran”.

“Kampu Greter Sunrise maioria iha área Timor-Leste nian no liu metade asõens Join Venture na’in mak Timor GAP (Timor-Leste), pozisaun loloos Governu nian mak aselera dezenvolvimentu Tasi Mane atu fó kondisaun adekuada ba seguransa kadoras mai iha Timor-Leste”, reafirma Patrocínio.

Nia haktuir, Timor-Leste sei lakon ninia soberania hanesan paíz soberanu ida, tanba labele asegura ninia direitu ba riku-soin, halo ema seluk ka rai seluk foti direitu Timor-Leste ba domíniu petróleu no gás iha Tasi Timor.

“Tanba ne’e CNRT kontinua ezije Oitavu Governu atu aselera dada kadoras mai Timor-Leste, nune’e labele sakrifika tan povu nia riku-soin, tanba povu barak sei moris terus”, subliña Patrocínio.

Tuir nia, Governu ne’ebé viabiliza husi partidu FRETILIN dau-daun ne’e halo esforsu atu sakrifíka tán Timor-Leste ninia riku-soin ba rai seluk, hanesan uluk Governu FRETILIN asina tiha akordu CMATS (Acordo Marítimo no Mar de Timor) atu Timor-Leste ho Austrália labele diskute FM dentru tinan 50 nia-laran.

Nune’e loloos tenke orgullu, onestu atu selebra vitória FM ho Austrália. Ho líder Kay Rala Xanana Gusmão, hamutuk ho nia ekipa negosiadór konsege manan FM.

“Tanba sé Timor-Leste laiha kbi’it ba negosiasaun, Timor-Leste ohin loron hateke de’it rai seluk mak explora rame-rame ita-nia rikeza iha Tasi Timor”, dehan deputadu CNRT ne’e.

FRETILIN diskorda

Hatán ba kestaun ne’e,  Xefe bankda FRETILIN, Francisco Miranda Branco, hateten FRETILLIN diskorda ho akordu ne’ebé fahe pursentu 30 ba Austrália no Timor-Leste hetan pursentu 70.

Tanba tuir FRETILIN, akordu ne’ebé iha asina ho ansi liu, nune’e la fó direitu totál ba Timor-Leste atu sai na’in loloos ba nia riku-soin rasik.

“Ita labele dúvida seriedade polítika iha ita-nia rain, liu-liu ba explorasaun rekursu petrolíferu iha ita-nia rain, maibé ita rejista buat balun iha akordu ne’e, karik iha altura ne’ebá mak ita tau dokumentu, karik tau dokumentu rua ne’e kona-bá FM ho riku-soin ne’e ketak-ketak, karik ida ne’e sai klaru liu tan, sei fasilita desizaun sira ne’ebé tuir mai”.

“Maibé ami haree hanesan ansi demais iha desizaun ida akordu ne’e, entaun tau kláuzula ida iha ne’e mak la’ós Timor de’it atu deside pipeline ne’e, maibé tur hamutuk ho Austrália mak tenke deside. Tanba Austrália kuandu deside dehan labele mós labele ona, maske ita hakarak mai de’it, entaun ida ne’e sai frakeza tiha ona”, esplika deputadu bankada FRETILIN ne’e.

Akordu delimitasaun FM ne’e asina iha loron 6, fulan Marsu, tinan 2018, iha Nova Iorke. Say

Lee hotu :   Auto-estrada Suai nakfilak ba Lagoa

Add to Comments Here!!!!

error: Content is protected.
Secured By miniOrange
You might also like:
Relatóriu FONGTIL kona-bá PEDNSS sai ezemplar ba MS

Ministra Saúde, Odete Maria Freitas Belo,...

Pagamentu ba lista reklamante la’o lentu, PM husu ba inan-aman tenke pasiénsia

Primeiru Ministru (PM), Taur Matan Ruak,...

Governu sei halo diálogu ho membru ASEAN

Ministra Negósiu Estranjeiru no Kooperasaun (MNEK),...

Close