JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

Ró Haksolok la mai TL, CNRT ezije MP investiga Mari Alkatiri

Ró Haksolok la mai TL, CNRT ezije MP investiga Mari Alkatiri

Bankada Congresso Nacional Reconstrução Timorense (CNRT) ezije ba Ministériu Públiku (PM) atu halo investigasaun ba Autoridade Rejiaun Administrativa Espesiál Oe-Cusse Ambeno no Zona Espesiál Ekonomia Sosiál Merkadu (ZEESM), ne’ebé lidera husi Marí Alkatiri, iha tempu ne’eba, tanba Estadu gasta ona osan USD tokon 10 resin, maibé to’o ohin loron Ró Haksolok seidauk bele mai Timor-Leste, maske iha tinan kotuk Marí Alkatiri bolu ona Bispu Dom Carlos Filipe Ximenes Belo no Madre Guilhermina Marçal sai hanesan inan-sarani ba ró ne’e, halo ona lansamentu Ró Haksolok iha Portugál.

Nune’e, deputadu bankada CNRT, Ricardo Batista, liu husi konferénsia imprensa iha Parlamentu Nasionál (PN), Kuarta (25/11/2020) husu ba MP atu avansa eskándalu akizisaun Ró Haksolok ba tribunál, tanba deskonfia iha indísiu krime barak iha prosesu refere.

CNRT mós la konkorda atu VIII Governu ida ne’e atu tau tan osan iha OJE tinan 2021 ho montante USD tokon 16,9, hodi hadi’a ró refere.

“Bankada CNRT la konkorda ho desizaun husi Governu de faktu inkonstitusionál nian atu hasa’i tán povu nia osan USD tokon 16,9, hodi selu Ferry Haksolok  ne’ebé oras ne’e ferujen tiha ona, inklui konstrusaun Pontoens atu ró atraka”.

“Bankada CNRT husu ba MP atu halo servisu imparsiál no aplika doutrina katak ema hotu hanesan iha lei nia oin. Labele halo favoritizmu ba Mari Alkatiri no individu sira seluk ne’ebé halo abuzu de uzu ba povu nia osan iha RAEOA-ZEESM. Enkuantu MP aselera prosesu hasoru sidadaun sira seluk. Maibé dau-daun ne’e kompañia Atlantic Eagle Shipbuilding Lda. bankarota tiha ona, alende ne’e kondisaun Ferry Haksolok mós at loos ona, tanba para kleur iha tasi-laran no ferujen hotu ona”, deklara deputadu Ricardo Batista.

Tanba ne’e, bankada CNRT hakarak hatene bainhira mak MP atu avansa eskándalu akizisaun Ferry Haksolok ne’e ba tribunál.

“Tanba Câmara de Contas nia auditoria iha tinan 2018 deskobre ona indísiu krime ba Ferry Haksolok, maibé tanba sá mak prosesu investigasaun ba Ferry Haksolok ne’e lori tempu naruk liu”, deklara deputadu CNRT ne’e.

Iha okaziaun ne’e, bankada CNRT nota katak, RAEOA-ZEESM sei iha saldu jerensia USD tokon 177.4 ne’ebé autoridade subar ba PN atu asesu paradeiru husi osan refere, tanba ne’e laiha fatin ba RAEOA atu husu tán osan ba Governu Sentrál.

“Bankada CNRT mós hakarak informa ba públiku katak, Autoridade RAEOA-ZEESM komete iregularidade ba indísiu krime nian ne’ebé fó prejuízu ba Estadu Timor-Leste, hanesan, RAEOA-ZEESM deve hela ba kompañia Instituto de Soldadura e Qualidade ka ISQ osan besik USD 600”.

Bankada CNRT haktuir, tuir informasaun husi Prokuradór Jerál Repúblika, José Ximenes iha mídia katak, Ferry Haksolok iha hela prosesu investigasaun kriminál nia-laran. Bankada CNRT konsidera katak tuir loloos Governu de faktu labele halo tán pagamentu ba objetu krime nian ne’ebé iha hela prosesu investigasaun kriminál nian.

Ho faktu sira relasiona ho eskándalu Ferry Haksolok hanesan mensiona iha leten ne’e mak bankada CNRT deklara ba públiku ezijénsia sira hanesan tuir mai ne’e: Bankada CNRT hakarak hatene bainhira mak MP atu avansa eskándalu akizisaun Ferry Haksolok ne’e ba tribunál, tanba Câmara de Contas nia auditoria iha tinan 2018 deskobre ona indísiu krime ba Ferry Haksolok, maibé tanba sá mak prosesu investigasaun ba Ferry Haksolok ne’e lori tempu naruk liu; Ferry Haksolok agora iha prosesu investigasaun MP, nune’e labele bo’ok, inklui labele aumenta tán osan. Ezemplu projetu balun husi projetu 143 ne’ebé Governu labele selu, tanba tama hela prosesu investigasaun kriminál nian, nune’e laiha razaun atu Governu ida ne’e atu tau tán osan ba Ferry Haksolok; Husu ba Câmara de Contas no MP atu obriga autoridade RAEOA-ZEESM hatudu Konta Bankária ba Osan USD millaun 177.4 ne’ebé Autoridade rai iha Banku Komersiál, maibé seidauk hetan auditoria. Bankada CNRT hakarak hatene osan ne’e nia jurus ka funan hahú husi osan ne’e depozita iha Banku to’o ohin loron, inklui USD millaun 35 iha Fundu Ekonomia Dezenvolvimentu (FED) ne’ebé kapitalizadu ona.

Bankada CNRT husu ba MP atu hatene prosesu sosa USB ida ho folin USD 450 ne’e la’o to’o ona iha ne’ebé? Tanba Bankada CNRT fiar katak MP iha kapasidade atu investiga eskándalu USB karun liu iha mundu ne’e ho fásil, públiku presiza hatene prosesu USB USD 450 ne’e to’o iha ne’ebé no la’o oinsá ona. Bankada CNRT ezije ba Governu de faktu inkonstitusionál atu labele aproveita asaltu podér ne’e, atu salva Mari Alkatiri ba osan USD millaun 17 resin ne’ebé mout ona iha Tasi Portugál nian; Bankada CNRT husu ba MP atu halo servisu imparsiál no aplika doutrina katak ema hotu hanesan iha lei nia oin. Labele halo favoritizmu ba Mari Alkatiri no indivídu sira seluk ne’ebé halo abuzu de uzu ba povu nia osan iha RAEOA-ZEESM. Enkuantu MP aselera prosesu hasoru sidadaun sira seluk.

Deputadu bankada CNRT sira haktuir tan, eskándalu Ferry Haksolok ne’e hatudu momoos oinsá hahalok anti Estadu husi Mari Alkatiri, tanba líder Anti Estadu mak fakar tiha Estadu nia osan saugate de’it, depois hakarak husu tán osan atu taka osan ne’ebé nia gasta tiha ona.

Relasiona ho kestaun ne’e Xefe bankada FRETILIN, Francisco Miranda Branco, hateten, problema ne’e nia hun mak Governu hili fali empreza ida ne’ebé mak atu bankarota, nune’e implika ba Ró Haksolok to’o ohin loron ró refere la konsege mai Timor.

“Problema ne’e nia hun mak ita hili fali empreza ida ne’ebé mak atu bankarota ne’e, entaun sira aproveita fali ita katak Timor-Leste mai ne’e ita atu aproveita moris  fali ona,  entaun ita hamoris fali empreza ida atu mate ona ne’e, nusa la loke konkursu públiku para hili loloos  empreza ida ne’ebé nia finansa saudável, atu bele halo konstrusaun ba ró ida ne’e, problema ne’e nia konsekuénsia mak to’o agora ne’e, ita lalika buka sala ba malu, sé iha jestaun ne’ebé laloos, iha sistema, tenke responsabiliza, ema ida labele sees husi ne’e”.

“Hanoin ida ne’e ko’alia ho Governu rasik, tanba Ró Haksolok ne’e agora iha Governu nia jestaun, ne’e duni di’ak liu ko’alia rasik ho Governu”, tenik deputadu bankada FRETILIN ne’e.

Antes ne’e, Governu Timor-Leste aloka osan USD tokon 14 ba akizisaun Ró Haksolok, maibé la konsege finaliza, tanba ne’e iha proposta Orsamentu Jerál Estadu tinan 2021, Governu propoin tan USD tokon 16, inklui USD tokon 2 ba pontoens, hodi konklui reabilitasaun Ró Haksolok. say

Lee hotu :   FRETILIN, PLP HO KHUNTO, SEI DESKUTI SUBSTANSIAL KOLIGASAUN

Add to Comments Here!!!!

error: Content is protected.
Secured By miniOrange
You might also like:
FKD-MS koopera elimina TBC iha Baucau

Fundasaun Klibur Domin (FKD) hamutuk ho...

Governu sei integra veteranu sira dezenvolve setór agrikultura

Vise Ministru Agrikultura no Peska (MAP),...

Sosiedade Sivíl: Governu presiza investe ba setór edukasaun

Koordenadór Nasionál Civil Society Éducation Partnership...

Close