CNRT kondena membru PNTL hurlele komunidade sunu sasán sesta bázika

Xefe bankada CNRT, Duarte Nunes, kondena aktu membru Polísia Nasionál Timor-Leste (PNTL) iha postu administrativu Lacluta, munisípiu Viqueque ne’ebé halo agresaun fíziku hasoru komunidade ne’ebé sunu sasán bázika, tanba loloos ne’e tempu ona atu baku ema no tenke halo uluk investigasaun lai.

“Ha’u hanoin polísia la’ós ona tempu atu baku pesoál ne’ebé sunu Sesta Bázika, sé ita deskonfia nia sala kaer tiha ba prosesu investigasaun, buat ne’e planeadu ka oinsa, emosionál mak mosu ka. Ita Baku signifika ita julga ona nia, tanba ne’e husu ba polísia sira ko’alia labele ho emosaun. Problema ne’e mosu tanba Governu la kumpre nia promesa bainhira presu sesta bázika USD 25 no sosa produtu lokál, maibé realidade presu Sesta Bázika la to’o USD 25 no la sosa produtu iha rai-laran, maibé sosa iha rai-liur”, Xefe bankada CNRT, Duarte Nunes ba jornalista sira iha Parlamentu Nasionál, Tersa (1-12-2020).

Ho nune’e, CNRT konsidera Governu la’ós atu halo rekuperasaun ekonomia iha rai-laran, maibé halo rekuperasaun iha rai-liur, tanba sosa produtuhusi rai-liur.

“Durante Governu distribui Sesta Bázika laiha transparénsia, ho nune’e halo komunidade la satisfaz ho buat hirak ne’e mak halo komunidade sira sunu Sesta Bázika iha membru Governu nian oin. Ita haree aproveitamentu husi membru Governu sira hetan perdiam direitu USD 25 ne’ebé Governu promesa bele mantein, maibé muda sistema tenke hanoin buat hirak ne’e, tanba foin akontese primeiru. Intensaun di’ak dalaruma promove produtu loja husi do benefício ba ema ne’ebé motiva sira atu aumenta sira-nia produsaun, realidade hatudu produtu lokál la to’o ita labele bosok povu, mosu produtu importadu, ida ne’e bosok povu, tanba produtu lokál la sufisiente”, tenik Xefe bankada CNRT ne’e.

Xefe bankada FRETILIN, Francisco Miranda Branco, esplika, bankada FRETILIN mós simu ona relatóriu husi Governu relasiona ho komunidade sunu Sesta Bázika iha munisípiu Viqueque ne’ebé ema hotu hein atu simu, maibé iha ema balun lakohi simu.

“Tuir loloos polísia labele baku maske hahalok komunidade nian ne’e krime, maibé ita la hatene, ita hotu laiha fatin akontesimentu, ne’ebé seguransa iha altura ne’ebá sente ida ne’e krime ema barak hein atu simu ema ida nia hakarak sunu, maibé ema hotu hein atu simu. Governu implementa programa Sesta Bázika bazeia ba avaliasaun Governu nian kona-bá subsídiu USD 200, komunidade ladún uza osan ho di’ak, hodi sosa buat ne’ebé esensiál. Ho nune’e Governu deside distribui ai-han di’ak tuir ami-nia pontu de vista, tanba previzaun husi Governu to’o fulan Dezembru fim do ano ne’e sei mosu menus ai-han iha Timor-Leste, entaun iha fulan hira nia-laran ne’e Governu fó apoiu ai-han ba família hotu universál. Programa ida ne’e atu intensiva ita-nia produtór sira atu produz liu tan, tanba iha ona merkadu populasaun ne’ebé simu la presiza simu nia bele fa’an fali“, tenik Branco.

Kazu sunu sasán Sesta Bázika ne’e akontese iha loron 29, fulan Novembru, tinan 2020, bainhira Governu liu husi Centro Logística Nacional (CLN) distribui Sesta Bázika iha postu administrativu Lacluta, munisípiu Viqueque, tanba komunidade la satisfaz ho  presu  Sesta  Bázika  ne’ebé  distribui.

Entretantu Governu distribui ona Sesta Bázika iha munisípiu Díli, Bobonaro, Covalima no Viqueque. ety