FRETILIN konsidera kritika CNRT iha balun loos

Vise Xefe bankada FRETILIN, Antoninho Bianco, konsidera krítika husi bankada CNRT hasoru Governu iha ámbitu Estadu Emerjénsia (EE) ne’e iha buat balun loos.

“Kona-bá COVID-19 liga ba tratamentu saúde, prevensaun ba buat sira ne’e kolega sira ohin hateten buat balun loos, tanba ne’e COVID ida liga ba saúde hodi halo prevensaun regra emerjénsia, nune’e EE aplika emerjénsia. Ida ne’e atu hatudu sé mak bele tanba ne’e ha’u hanoin loos duni sé ai-moruk laiha kestaun ne’e oinsa, tenke rezolve ne’e COVID ligasaun ema nia saúde”, Deputadu bankada FRETILIN neé liu husi ninia intervensaun iha plenária iha debate ho Governu kona-bá implementasaun medidas adotadas iha ámbitu EE, PN, Tersa (12/01/2021).

Tanba tuir bankada CNRT, konsidera VIII Governu Konstituisionál má-organizadu, wainhira implementa EE ba da-sia sakrifika estudante no  povu sira.

“Aplikasaun EE ba da-sia foin halo ne’e rungu-ranga, ha’u hakarak justifika, tanba saída mak EE da-sia, primeiru ita sakrifika sarani sira atu ezerse hanesan sarani iha loron 31 Dezembru 2020 no loron 1 Janeiru 2021 bainhira sira hakarak selebra missa tinan foun nian, ita sakrifika tan ita-nia oan estudante sira, tanba agora eskola barak seidauk hahú. Nia esplika, Implemensaun EE la’os buat foun maibé molok ne’e implementa tiha ona bainhira governu atu implementa EE ho rigoroju ministério  iha ona  preparativu  iha eskola sira molok sira hahu sira nia eskola maibé realidade eskola barak sedauk hahu. Iha parte seluk distribuisaun programa sesta  bázika kontinua la’o halibur ema barak tebes ho tempu durasaun ne’ebé mak naruk, nune’e ita hakarak dehan saída, ha’u bele hateten katak Governu má-organizadu”, Deputada bankada CNRT, Virginia Ana Belo.

Nia akresenta, razaun Governu má-oganizadu, tanba hakarak aplika EE ho rigorozu, maibé realidade la halo buat ida.

“Ha’u fó ezemplu trata subsídiu uma-kain mós to’o agora ita rai to’o ohin loron, subsídiu ba  front line ba ekipa lobaratóriu nasionál, ekipa vijilánsia sira no seluk tan to’o agora ita sei deve durante fulan 9, hoteis, catering ita sei deve nafatin aumenta sesta bázika, ikus liu mak saláriu 13 ba funsionáriu sira, ne’e ita hatudu má-organizadu duni aplika buat ida depois la prepara hodi bele sakrifika ema barak“, dehan Virginia.

Iha loron 30, fulan Dezembru, tinan 2020, Konsellu Ministru (KM) aprova medida ezekusaun, renova EE ne’e husi dekretu Prezidente Repúblika  númeru 73/2020 atu hatán ba pandemia COVID-19.

Dekretu Governu refere obriga ema hotu ne’ebé la sujeita ba rejime izolamentu obrigatóriu tenke mantein distánsia sosiál, bandu halo sorumutu ka halo manifestasaun, bandu mós realiza kualker eventu ho karákter relijiozu no bandu halibur ema liu na’in 10. ety