José Reis esplika Governu la politiza kazu COVID-19 iha Timor-Leste

Vise Primeiru Ministru (PM), José Reis, hateten, Governu la politiza situasaun COVID-19, tanba kazu ne’e problema mundiál, la’ós Timor-Leste mesak mak enfrenta, nune’e obriga Governu tenke halo servisu maka’as hodi halo prevensaun  la’ós politiza.

“Laiha ida iha intensaun no mós laiha intensaun atu politiza situasaun COVID-19, buat hotu ne’ebé Governu foti desizaun atu bele halo kontinuasaun ba prevensaun de’it, ne’ebé mak Governu halo dezde inísiu tinan 2020, fulan Marsu liu ba to’o agora, ho intensaun oinsa mak ita bele salva Timor-Leste hosi pandemia ida ne’ebé mak kona mundu tomak”, argumenta Ministru ordenamentu teritoriu hato’o liu hosi diskusaun ba implementasaun medida prevensaun  COVID-19 iha Timor-Leste, PN, Tersa (12/01/2021).

Alénde ne’e, deputadu opozisaun, Adérito Hugo, konsidera asaun ezekutivu sira laiha medida prevensaun iha estensaun Estadu Emerjénsia (EE) ba da-sia nian.

“Ita la halo polítika duni, maibé ita hakarak serví ita-nia povu ho responsabilidade, liu hosi dever ida-idak nian rasik, prátika sira ne’ebé ita boot (Governu) sira halo ne’e mak dehan politizasaun ne’e, laiha responsabilidade para atu halo atendimentu, depois diskursu sira ne’e mai iha PN, ita pániku de’it iha fim do mes, kuandu ita hakarak halo estensaun EE, hotu tiha nonook ona, ne’e mak ita dehan halo polítika, polítika atu serví povu ne’ebé ita la sériu, Prezidente Repúblika (PR) hateten Parlamentu Nasionál (PN) labele abandona nia fatin, sim PN labele abandona nia kompeténsia hodi autoriza pedidu estensaun ne’e, kompeténsia tuir mak ezekutivu atu implementa, depois povu halerik iha fatin ne’ebé-ne’ebé, hakilar ba PN, hakilar ba PR la’e, hakilar ba Governu, tanba Governu mak ezekuta desizaun Estadu nia”, esklarese deputadu opozisaun ne’e.

Iha estensaun EE ba da-sia, Oitavu Governu hasa’i dekretu Governu ida hodi halo medida prevensaun ne’ebé rigorozu, bandu sidadaun sira atu halibur malu liu ema na’in 10, eseptu família uma-laran, tenke uza másakra, labele hala’o serimónia kulturál ne’ebé akumula ema barak, hodi garante sosiál distansia. say