PLP: HNGV fó prioridade liu osan do que ema nia vida

Reprezentante povu iha uma fukun Parlamentu Nasionál (PN), bankada  PLP kestiona atendimentu Hospital Nacional Guido Valadares (HNGV), tanba fó prioridade liu ba osan do que ema nia vida. Tanba durante saudozu Sabino Soares “Guntur” baixa iha sala Very Important Person (VIP) no wainhira kondisaun grave sai husi sala VIP ba fali ba sala Intensive Care Unit (ICU) no hosi parte HNGV ezije selu.

Tanba ne’e, deputada PLP lamenta katak, tuir loloos HNGV haree kondisaun ba saudozu Guntur la’ós ezije fali osan.

“Ami nia belun Guntur baixa iha ospitál iha loron hirak liu ba to’o nia mate situasaun ida ne’ebé mak kestionavel tebes iha sala VIP ami nia belun ne’e baixa, maibé nia seidauk sai hosi ospitál ho situasaun ne’ebé grave ona foin muda ba iha ICU. Maibé husi parte HNGV ezije atu selu la-lais VIP, ha’u nia pergunta mak ida ne’e ita preokupa uluk mak ema ne’ebé ho situasaun grave ka ita preokupa liu mak nia tenke selu ne’e sá tan nia nu’udár membru PN“, Deputadu bankada PLP, Noé da Silva “Buka Tuir” hato’o kestaun ne’e liu hosi ninia intervensaun iha plenária, Tersa (26-01-2021).

Ministru Asuntu Parlamentar no Komunikasaun Sosiál (MAPKOMS), Francisco Jeronimo, hateten, nia parte sei hato’o ba ministériu kompetente  atu haree kestaun ne’e.

Entretantu saudozu Sabino Soares “Guntur” nu’udár reprezentante povu  hosi bankada PLP, nia hakotu peregrinasaun moris iha mundu iha loron 23,  fulan Janeiru ne’e, tinan 2021, iha Hospital Nacional Guido Valadares (HNGV), tanba sofre moras ran-midar. ety