Fulan Abril, FRETILIN realiza KN hili lideransa foun

Xefe bankada FRETILIN, deputadu Francisco Miranda Branco, informa, posibilidade fulan Marsu ou Abril FRETILIN realiza ona Kongresu Nasionál (KN) hodi halo eleisaun ba estrutura foun ba líderansa partidu FRETILIN nian.

Maske nune’e, líder FRETILIN ne’e afirma, sei bazeia ba situasaun, tanba Timor-Leste rejista ona kazu transmisaun lokál, nune’e, labele viola regra protokolu sira husi Organizasaun Mundiál ba Saúde nian.

“La kleur tan ami sei halo retiru hosi plataforma, depois iha fulan Marsu ou Abril ne’e, tanba agora prepara dadauk ajenda, hodi halo konferénsia. Kona-bá Kandidatu ne’e seidauk, ne’e sei prosesu, kuandu define loloos hili ona CPN, entaun loke ona avizu, atu kandidatu sira bele kandidata sira nia-an. Tanba regra sira (EE) ne’e estabele hosi Estadu, partidu mós tenke haree didi’ak, situasaun ida ne’ebé konviniente liu, atu labele viola fila-fali regra protokolu ne’ebé Organizasaun Mundiál Saúde ne’ebé ita-nia saúde nasionál estabelese”,subliña Francisco ba jornalista sira iha PN, Sesta (26/02/2021).

Alénde ne’e, liu hosi komunikadu imprensa ne’ebé GMN asesu hosi Komité Sentrál FRETILIN (CCF-Sigla portugés), estrutura munisípiu Díli husu militante partidu FRETILIN hotu hosi territóriu nasionál atu mantein hakmatek, hodi fó biban ba CCF deside didi’ak tempu ba kongresu nasionál ne’ebé sei realiza iha tempu badak.

Iha kongresu nasionál ne’e sei halo eleisaun ba estrutura foun, tuir estatutu partidu nian, hodi garante vitória ba eleisaun prezidensiál tinan 2022 no eleisaun jerál tinan 2023.Say