PLP husu Governu aperta ema tama-sai ilegál iha fronteira

Deputada Bankada PLP, Rosalina Ximenes, husu oitavu Governu atu hola medida rigorozu, hodi tiru tohar ema ne’ebé la obdese ba regra Estadu Emerjénsia (EE) hodi kontinua tama-sai ilegál iha fronteira terrestre, tanba lori risku ba sidadaun tomak iha territóriu nasionál.

“Husu ba Governu, atu aumenta medidas rigorozu iha fronteira, hodi nune’e, ema hotu tenke kumpri regras sira ne’ebé Governu tau, sira ne’ebé mak ulun fatuk to’os karik, lakoi koopera ho seguransa iha fronteira, la kumpri regras sira ne’ebé mak estadu tau, di’akliu tiru tohar tiha sira nia ain ba, duke ema barak mak sofre ba ida ne’e. Ida seluk ema ne’ebé mak hakarak tama sai tuir sira nia hakarak, di’akliu lalika fó gratuita ba sira durante kuarentena, husik ba sira seluk mesak para sira bele sente, para sira labele tama sai tuir sira-nia hakarak de’it”,afirma deputada Rosalina, iha diskusaun estensaun EE ba da-11, Segunda (01/03/2021).

Alénde ne’e, deputada Fretilin, Gabriela Alves mós hateten, pesti COVID-19, hanesan tempu invazaun ne’ebé tentara Indonézia invade Timor-Leste , tanba inkonsistensia Timor-oan sira-nia rasik.

“Se ita halo referénsia karik, pesti ne’e hanesan luta 24 anos ne’ebé ita funu hasoru invazór Indonézia, tanba iha 7 de Dezembru ne’e, Indonézia konsege tama iha fronteira terrestre mai tama Timor, tanba iha Timor-oan lubuk ida ne’ebé sai matadalan. Ohin mós se ita halo referénsia, moras COVID-19 ne’e mai tama Timor, tanba Timor-oan lubuk ida ho sira nia inkon­siente ne’e, la’o ba mai, hodi lori moras ne’e tama mai iha Timor-Leste.”tenik.

Kazu importasaun ne’e, Ministériu Saúde indentifika liuhosi rastreiu, iha loron 23, Fulan Fevereiru, tinan 2021.

Hosi fulan marsu, tinan 2020 to’o Feve­reiru tinan 2021 ne’e, rejista ema rihun ida resin mak tama sai ilegál iha fronteira terrestre. Say