MF TL – MF RI asina memoradum atu fasilita komunidade sira ne’ebé halo neg’osiu iha fronteira

Governu Timor-Leste (TL), ho Governu Repúblika Indonésia,  liu husi Ministériu  Finansas rai rua ne’e nian, asina memorandum intendimentu ida hodi fasilita komunidade sira ne’ebé hala’o atividade komérsiu iha fronteira rai rua ne’e.

Ministra Finansas interino, Sara Lobo Brites, informa,   memorandum ne’e  atu fasilita negósiu komunidade sira ne’ebé hela iha área fronteira.

“Atu fasilita komunidade nia negósiu iha área fronteira, Governu Timor-Leste liu husi Ministra Finansas asina ona memorandum ho Ministra Finansas Indonésia nian, atu bele fasilita komunidade ne’ebé halo atividade komérsiu iha fronteira entre rai rua ne’e ho di’ak, tanba ita hatene katak, durante ne’e komunidade sira ne’ebé hela iha área fronteira, sempre halo negósiu ilegal. Ne’eduni atu evita atividade ilegal ne’ebé durante ne’e komunidade sira halo, Governu sei hari’i postu iha Tunu Bibi hodi bele fasilita komunidade iha área refere”, hateten Sara Lobo  Brites ba Jornalista iha Bobonaro, Sesta (24/05/19).

Iha biban hanesan,  Sara Lobo mós fanun Autoridade Lokal Munisípiu Bobonaro no komunidade sira atu prepara aan didi’ak hodi bele implementa programa Governu, nune’e  bele fó benefísiu ba komunidade sira iha área fronteira hodi halo negósiu tuir dalan legal.

Iha fatin hanesan, Diretur Jeral Alândega, José Abilio Fátima, haktuir mós  aktesenta, atu fasilita komunidade Maliana hodi halo  atividade negósiu ho di’ak, Governu sei hari’i Postu  Alfândega iha área Tunu Bibi,  nune’e bele redus atividade ilegal sira ne’ebé sempre akontese bebeik iha lina Fronteira entre Timor-Leste no Indonésia.

 “Atu evita komunidade sira hela iha área fronteira ne’ebé sempre halo negósiu ilegal, Governu sei hari’i Postu Alfandega hodi bele fasilita  negósiu komunidade sira hodi bele redus problema halo negósiu ilegal  iha área fronteira”, katak José Abilio.

Alende ne’e, Prezidente Autoridade Munisípiu Bobonaro, Josefrino  Soares dos Santos,  husu ba Emprezáriu no Komersiante sira atu prepara aan hodi  bele kompete iha merkadu no labele depende de’it ba setór públiku

Entretantu Antes ne’e Unidade Polísia Fronteira prende sasan ilegal husi komunidade iha lina fronteira, tanba sira sempre halo atividade negósiu ilegal.aba