Asidente tráfegu iha RAEOA, Rezulta ema tolu mate no na’in hitu kanek

Asidente tráfegu ne’ebé mak akontese iha Rejiaun Administrátiva Espesiál Oe-Cusse Ambeno (RAEOA), rezulta ema na’in tolu mate no na’in hitu kanek.

Ema  na’in tolu ne’ebé mak mate,  mak hanesan José  da Silva, Abilio  Araújo no Henrica Oki.

Asidente tráfegu ne’e akontese Domingu (12/07/20) mais ou menus tuku ualu ho balun kalan.

Alende rezulta ema na’in tolu mate, pasajeiru na’in hitu mós hetan kanek no dau-dauk ne’e hala’o hela tratamentu iha ospital referénsia Oe-Cusse.

Tuir Porta-voz PNTL, Superintendente Xefe Arnaldo Araújo, haktuir, asidente ne’e akontese, halo ema na’in rua mate iha fatin akontesimentu, na’in ida mate iha ospitál referénsia Oe-Cusse.

“Ha’u atu dehan, asidente  akontese tanba kareta tula sasán todan no sa’e subida maka’as, ikus mai kareta nia forsa laiha, kareta ne’e mós travaun sama la hán, ikus mai monu tuun ba rai naruk ho distánsia metru  23,5”, esplika  Porta-voz PNTL, Superintendente Xefe Arnaldo Araújo ba jornalista sira, liu husi konferénsia  imprénsa iha Kuartel Jerál, Kaikoli, Díli.

Kondutór ne’ebé mak kondus kareta ho inisiál F.C submete ona ba prosesu investigasaun. avi