Horta: Asaun karidade Xanana hanesan áktu hadomi povu

Diplomata senior, José Ramos Horta, hatete, asaun karidade ne’ebé Kay Rala Xanana Gusmão halo la’os asaun polítika, maibé hatudu sentimentu kompaixaun ba ferik-katuas.

Asaun karidade ne’ebé Líder Nasionál halo hanesan aktu ajuda Governu no Estadu no apoiu refere mai husi Timor-oan sira no la’os mai husi embaixada ruma.

“Ne’e konforme sira ida-idak nia hanoin ne’e ha’u labele proíbe, sé hanoin asaun ne’e polítika, prontu bele hanoin hanesan ne’e. Buat barak ne’ebé mak ha’u halo ne’e nunka média haree tanba ha’u halo mesak-mesak, entaun ne’e polítika saída? no la’os agora de’it, dezde uluk kedas, portantu hau kontinua halo nafatin. Sé sira bee krítika ne’e hatete ne’e asaun polítika. Entaun buat ne’ebé señora Isabel Ferreira ema di’ak teb-tebes. Uluk kedas nia ajuda povu barak-barak, entaun ida ne’e ita bele konsidera. Primeira Dama mós iha programa ki’ik-oan ajuda povu sira. Portantu líder sira ne’e tenke hatudu ida ne’e, sentidu kompaixaun, karidade no solidariedade. Sira be krítika hodi hatete ne’e polítika ha’u simu de’it la buat ida, ha’u kontinua halo”, eis Prezidente Repúblika ne’e iha ninia rezidénsia eis titular Farol-Díli, Kinta (29-10-2020), hafoin despede embaixadór Brasil, Koreia Sul no Estadu Unidu Amérika, ne’ebé termina ona sira-nia misaun iha Timor-Leste.

Alénde ne’e, Ramos Horta, subliña, asaun karidade ne’e rasik organiza husi emprezáriu Timor-oan sira no halo lista no kontaktu ba Xanana nia eskritóriu. Asaun karidade ne’ebé maka maun boot Xanana halo ne’e foku liu ba ferik-katuas sira no ema ho difisiénsia, la’os ba povu tomak.

“Ba povu tomak ne’e, Horta hatete, laiha kbi’it, ita laiha kbi’it, ne’e Estadu mak bele haree no haree daudaun. Karidade ne’e mai husi ita nia relijiaun Kristaun Katóliku, uluk kedas igreja hanesan hanorin ami halo karidade. Ita-nia rai progresu barak tinan 20 nia laran ne’e mosu buat barak pozitivu. Maibé sei iha kiak barak,liu-liu ferik katuas sira”, hatete Horta.

Antes ne’e Líder Nasionál, Kay Rala Xanana Gusmão halo ona asaun karidade iha fatin barak hanesan ajuda ferik-katuas no ema difisiénsia sira ho sasan nesesidade bázika hanesan mina, foos no seluk tan. Oct