Sosiedade Sivíl: Governu presiza investe ba setór edukasaun

Koordenadór Nasionál Civil Society Éducation Partnership (CSEP), Jose de Jesus, husu, Oitavu Governu Konstituisionál presiza investe fundu ho valór boot iha setór edukasaun, liu-liu Orsamentu Jerál Estadu (OJE) tinan 2021, ne’ebé sei debate iha PN.

“Ami haree ho matan, ita triste kuandu ita haree ita-nia eskola, ita-nia alunu no ita-nia profesór sira ne’ebé mak hela iha aldeia no suku sira ne’e defísil tebes atu asesu dezenvolvimentu, setór edukasaun ne’ebé kompletu ho fasilidade eskola kadeira, meza no mós saneamentu i profesór mós la sufisiente atu hanorin no fasilita prosesu aprendijazen iha eskola, nune’e ami hanesan sosiedade sivíl rekomenda ba Parlamentu Nasionál (PN) no mós Governu atu bele sériu hodi bele investe OJE ida ne’ebé sufisiente ba setór edukasaun”, Koordenadór Nasionál CSEP ne’e ba jornalista sira iha Caicoli-Díli, Tersa (24/11/2020).

Razaun sosiedade sivíl husu Governu tau kestaun ne’e ho sériu, tanba tuir sira-nia monitorizasaun eskola barak iha teritóriu Timor-Leste barak mak hasoru dezafiu, eskola hirak ne’e maioria iha munisípiu Ermera, Bobonaro, Ainaro, Aileu, Baucau no Díli.

Problema ne’ebé eskola hirak ne’e hirak ne’e enfrenta hanesan falta kadeira, meza, profesór sira la sufsiente no seluk tan.

Monitorizasaun ne’ebé sira halo ne’e durante fulan nen, no kuaze eskola primária sira mak enfrenta situasaun ne’e. ina