Ospitál Maliana falta aimoruk

Bankada CNRT preokupa tebes ho situasaun ne’ebé Ospitál Referênsia Maliana, Munisípiu Bobonaro enfrenta, tanba dau-daun ospitál refere falta ai-moruk atu atende pasiente sira.

Deputada bankada opozisaun, Virgínia Ana Belo husu ba Governu, atu tau atensaun sériu ba kestaun refere, tanba agora iha ámbitu rai udan.

“Iha informasaun hosi Maliana relasiona ho aimoruk iha ospitál referal Maliana sira hateten katak, la’ós aimoruk ba moras perigu de’it mak laiha, maibé paracetamol de’it mós agora sira laiha hotu, ema sira ba konsulta doutór sira hateten aimoruk laiha. Enkuantu agora tempu udan, susuk barak, dengue no malária mós barak hamate ona ema, tanba sa mak aimoruk laiha fali ba fatin sira hanesan ne’e, ba moras sira hanesan nene’e, husu para Governu bele haree to’ok ba situasaun ida ne’e”, deklara reprezentante povu ne’e iha PN liu hosi plenária, Tersa (19/01/2021).

Tuir informasaun ne’ebé deputada ne’e asesa, SAMES laiha ona aimoruk ba ema moras bai-bain, iha mak aimoruk ba COVID de’it.

Iha tinan 2020 Saúde Muníspiu Díli (SMD) rejista kazu dengue kuaze 813  no mate na’in 7.

Alénde ne’e, iha Sentru Saúde Munisípiu Ermera mós konsege rejista kazu dengue kuaze 300 liu.

Kazu dengue mós rejista iha munisípiu Bobonaro, Baucau, Manatuto no Manufahi, inklui Covalima.

Relasiona ho stock aimoruk ne’e, GMN la konsege halo konfirmasaun ho parte SAMES. say