COVID-19: Kazu foun ida, 18 rekuperadu

Koordenadór Pilár VII COVID-19, Nilton do Carmo da Silva, hateten, Ministériu Saúde (MS) liu husi komisaun nasionál rejista tan kazu pozitivu foun COVID-19 Timor-oan mane ida (1) ho idade 28. Pasiente ne’e asintomátiku no dau-dauk ne’e iha ona izolamentu Vera Cruz, Díli.

“Atualiza kazu konfirmadu foun COVID-19, liu husi oportunidade ida ne’e ohin komisaun nasionál rejista tan kazu pozitivu foun COVID-19 Timor-oan mane na’in 1 ho idade 28. Pasiente ne’e asintomátiku no dau-dauk ne’e iha ona izolamentu Vera Cruz, Díli. Iha 4 Fevereiro 2021 nia viajen husi Londres, Reinu Unidu bá Doha ho aviaun Qatar Airlines. Iha dia 5 Fevereiro husi Doha ba Malázia, toba kalan ida iha aeroportu Kuala Lumpur. Iha 6 Fevereiro husi Malázia mai Díli, Timor-Leste”, Koordenadór Pilár VII COVID-19 hato’o informasaun ne’e liu husi konferénsia imprensa iha salaun enkontru Palaçio da Cínzas, Caicoli-Díli, Kinta (18-02-2021).

Nia esplika, sidadaun pozitivu COVID-19 ne’e hela iha kuarentena otél Carla Mansion hamutuk ho ema na’in 16 no teste Swab foti iha loron 16, fulan Fevereiru no rezultadu pozitivu relata iha loron 18, fulan Fevereiru.

Iha biban ne’e mós Nilton relata, Komisaun Nasionál COVID-19 mós inkorpora tan pasiente COVID-19 rekuperadu na’in 18 husi izolamentu Vera Cruz ba família, tanba rezultadu teste hatudu negativu.

“Pasiente rekuperadu na’in 3 husi Nasaun Tanzánia, na’in 2 tama klandestina no na’in 13 husi Indonézia liu husi pontu entrada Batugade, iha 20 Janeiro 2021”, informa Koordenadór Pilár VII COVID-19 ne’e.

Entretantu dadus MS iha loron 18, fulan Fevereiru, tinan 2021, kumulativu teste  20617, kumulativu negativu 20404. Hein rezultadu 110, kumulativu kazu 103, kazu foun 1, rekupera 18, atuál baixa 22, kuarentena         228 (Díli: 149, munisípiu: 79), auto kuarentena 24 (Díli: 4, munisípiu: 20), pasa ona 14 dias 7965 (Díli: 6575, munisípiu: 1390). eni