Uma kreda prontu koopera ho Governasaun AMP

Uma Kreda Katoliku, liu husi Diocese Dili, hato’o nia prontidaun atu koopera Governasaun Aliansa Mudansa ba Progresu (AMP) periodu 2018-2023.

Bispo Diocese Dili, Dom Virgilio do Carmo da Silva, SDB, hateten, uma kreda pronto kopera ho partidu vencedor ne’ebe maka hetan ona fiar husi povu hodi lidera Oitavu (VIII) Governu Konstitusional.

“Koalia kona-ba festa demokrasia, povu halo ona nia papel, agora entrega ba nai ulun sira, ba partidu ida ne’ebe maka sei lidera VIII Governu,” hateten Bispo Virgilio do Carmo da Silva, SDB, hafoin preside missa agradesimentu AMP nian iha Igreja Katedral Diocese Dili, Kinta (17/5/2018).

Bispo Virgilio do Carmo da Silva, SDB hein katak, partidu ukun Governu bele realiza komprimisiu politiku ne’ebe durante ne’e sira hato’o liu husi kampaña politika.

Nia hatutan, Igreja nafatin enkoraza ba Governu foun atu hakat ba oin hodi hametin, promove paz no estabilidade ba rai ida ne’e.

“Se deit maka Povu fiar igreja nafatin fo fiar atu hamutuk, fo liman atu servisu hamutuk, partidu ne’ebe deit maka povu fihir Igreja prontu atu kolabora ba rai no povu nia diak,” dehan Dom Virgilio.

Kona ba kargu Primeiru Ministru, Dom Virgilio  afirma katak, uma kreda la iha duvida ba lideransa AMP, hanesan Xanana Gusmão no Taur Matan Ruak, maibe importante maka ukun ho diak hodi hasai povu husi mukit.

Bispo DioceseDili apresia ho maturidade politiku nian, tanba hahu periodu kampaña to’o mai eleisaun antisipada, situasaun la’o diak tebes.

Rezultadu final Eleisaun Antesipada seidauk aprova husi Tribunal Rekursu, maibe iha apuramentu nasional final husi CNE, hatudu partidu Bloku Koligasaun Aliansa Mudansa ba Progreso (AMP) sai vensedor ho votus 309.663 (49,6 %), tuir  partidu historiku FRETILIN ho votus 212.324 (34,2%), Partidu Demokratiku ho votus 50.370 (8,1 %) no bloku koligasaun FDD ho votus 34.301 (5,5%). mia