PN husu MTK kria regra ba transporte públiku

Reprezentante povu iha Parlamentu Nasionál (PN), husu Ministériu Transporte no Komunikasaun (MTK), atu kria regras ne’ebé rigorozu ba transporte públiku sira, liu-liu kondutor sira atu nune’e bele asegura vida passajeiru sira nian.

Deputada Fernanda Lay husi bankada CNRT,  hato’o rekomendasaun ne’e, relasiona ho akontesimentu bis mout ho pasajeirus iha mota Kasnafa Manleuana, inklui akontesimentu sira seluk ne’ebé akontese iha fulan ne’e.

“Ha’u sujere MTK bis ou transporte maritime, bainhira halo viajen tenki manifestu lista passajeirus sira nia naran, para evita bainhira akontese ahi han karik, ró keta mout karik, liu-liu hanesan bis ne’ebé mout ne’e, ita bele hatene passajeirus hira loos mak iha laran, ita sei la konfuzaun hanesan informasaun bis nian ne’e, ne’ebé dehan ema ida lakon, lahatene lakon duni kala’e lahatene”, relata Fernanda Lay iha plenária PN,  Segunda (25/02/2019).

Tuir deputada bankada CNRT ne’e, Governu liu husi MTK tenki kria regras, no motorista ka kondutores ba transporte públiku terrestre, no marítima iha obrigasaun atu kumpri, nune’e labele afeita ba passajieru sira nia vida.

“Tenki iha obrigasaun para iha seguransa ba passajeiru sira,” afirma Prezidente Komisaun C ne’e.

Iha fulan Fevereiru ne’e, mosu akontesimentu hanesan, bis halai diresaun Díli Suai, ho naran Perekiki, mout iha bee moos Manleu nian, inklui baskolante ida diresaun Díli Suai nian ida mós, baku fila, inklui akontesimentu sira seluk tan.say