JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

PR Lú Olo : Estadu presiza veteranu sira atu sai ezemplu ba jerasaun foun

PR Lú Olo : Estadu presiza veteranu sira atu sai ezemplu ba jerasaun foun

Estadu presiza luta-nain sira atu sai ezemplu, sai modelu ba joven sira, sidadaun ida-idak no ba aman-inan sira hodi banati tuir sira-nia espíritu sakrifísiu, dedikasaun, fó-an tomak ba hothotu nia bein-estar, sira-nia onestidade, sira-nia espíritu domin Pátria no Povu.
Prezidente Republika, Francisco Guterres Lú Olo hato’o lia hirak nee iha nia diskursu iha selebrasaun loron veteranus ba dala rua iha tinan ne’e, Domingu (03/03/2019), iha palasio Governu.
Iha ambitu komemorasaun nee Prezidenti Repúblika husu ba Governu no sidadaun hotu-hotu atu haree klean hodi valoriza diak liu tan kombatente no veteranus.
“Ohin mós loron di’ak liu atu Estadu no sidadaun ida-idak, haree klean liután oinsá valoriza di’ ak liu Kombatente no Veteranu timoro-an sira, ne’ebe sei moris hela, maibé balun kiak tebetebes no balun moras no ferik ka katuas ona,” diskursu PR Lú Olo.
PR Lú Olo reforsa tan katak, tamba sidadaun sira ne’e luta durante tinan barak, sira la hetan asesu ba edukasaun formal ka formasaun profisional, no nune’e, la hetan oportunidade empregu, iha tempu ukun- an. Barak mai hosi família kiak no lahatene lee no hakerek.
“Importa haree oinsá hala’o lalais prosesamentu rejistu no verifikasaun dadus, ho konxiénsia katak, ita-nia rikusoin boot ida mak luta-na’in sira. Sira mak ita-nia eroí, riin-metin ba ita nia mehi ukun rasik-an no riin –metin ba nasaun ida ne’e,” haktuir, PR Lú Olo.
Nune’e, Estadu presiza luta-nain sira atu sai ezemplu, sai modelu ba joven sira, ba sidadaun ida-idak, ba aman-inan sira. Sidadaun ida-idak presiza hatuir sira-nia espíritu sakrifísiu, dedikasaun, fó-an tomak ba hothotu nia bein-estar, sira-nia onestidade, sira-nia espíritu domin Pátria no Povu.
Estadu presiza luta-nain sira atu mantein pás no estabilidade no atu partisipa mós iha dezenvolvimentu sósiu-ekonómiku.
Hahú kedas hosi Restaurasaun Independénsia, Estadu Timor-Leste sempre foti aas kestaun Kombatentes Libertasaun Nasional. Haree ba Konstituisaun Timor-Leste, hahú kedas hosi I Governu to’ o VIII Governu, hothotu hatudu liuhosi programa ida-idak nian, katak hakarak rekoñese no valoriza Kombatentes Libertasaun Nasional.
Oinsá Estadu rekoñese no oinsá valoriza diak liu veteranu sira? Tempu to’o ona atu hanoin klean ba kotuk, atu sukat no tetu ita-nia hahalok to’o ohin loron, se ita rekoñese no valoriza duni sira ka lae.
Biar ita la iha sistema atu avalia loloos, sé mak sé no halo saída iha tempu luta, Estadu loke rejistu dadus iha 2002 no, nune’e, ita-nia ema balun aproveita oportunidade hodi rejista-an, nu’ udar veteranus. Tinan ba tinan númeru rejistu aumenta no montante selu subsídiu mós aumenta ba beibeik.
Tuir dadus hosi Sekretariadu ba Asuntus Kombatentes Libertasaun Nasional, Timor-Leste iha ohin loron kombatentes 27.781, korresponde ba 2.1% populasaun.
Atu valoriza sira didiak, informasaun báziku de’it lató. Governu Timor-Leste presiza hatene informasaun liután atu bele halo análize di’ak no prepara polítika tuir dadus loloos.
Presiza hatene kona-ba ida-idak ninia estadu saúde (mentál, físika no mobilidade), situasaun finanseira, kondisaun hela-fatin, idade, servisu saída, iha ka la iha asesu ba servisu báziku, sá formasaun ka treinamentu mak simu hafoin 2002, iha dependente hira no ho otas hira, esperiénsia profisionál saída no oinsá hetan rendimentu ba moris loron-loron.
Veteranu ida-idak iha nia problema rasik no ida-idak merese simu tratamentu espesiál.
Importante ba Estadu tetu uluk sira-nia kondisaun moris ohinloron. Subsídiu de’ it la dignifika sira no dala ruma hamosu problema seluk. Estadu presiza haree programa reinsersaun sosial atu sira bele moris ho dignidade nafatin, nu’udar ita-nia eróis. Luta-nain sira, ne’ebé sei saudável, bele partisipa mós iha prosesu dezenvolvimentu ekonómiku no sosiál ho ninia kbiit no matenek rasik.
Estadu bele ajuda luta-nain sira atu uza di’ak liu subsídiu ne’ebé ohinloron sira simu. Bele ajuda harii Fundu Veteranus, fundu ida ne’ebé sei haree servisu oioin hanesan asisténsia médika, edukasaun no formasaun profisionál, asisténsia ba terseira idade no nesesidade seluk.
Luta-nain sira no família iha direitu atu simu benefísiu oioin maibé, ita labele haluha katak kombatente no veteranu sira ne’ebé sei saudável, la’ ós iha de’ it direitu maibé iha mós devér, nu’ udar sidadaun.
“Maibé too ohin loron ita seidauk dezenvolve baze-de-dadus kompletu, sistematizadu no atualizadu. Ita hein katak iha tempu badak Komisaun Instaladora sei organiza ho di’ak Primeiru Kongresu, atu Konsellu Nasional Kombatentes Libertasaun Nasional bele hahú funsiona, iha tempu badak, no rezolve problema no hatán preokupasaun Kombatente sira-nian,” espera, PR Lú OLo.
Nune’e, PR Lú Olo fiar katak partisipante sira hosi frente tolu no joven sira, iha Semináriu ne’ebe hala’o iha CCD, hariku projetu harii Fundu Veteranus, Ida ne’e mak dalan di’ak liu atu hamenus dependénsia Kombatentes no Veteranus.
Hosi ita-nia Fundu Soberanu mesak, Fundu Minarai, ne’ebé sustenta Orsamentu Jerál Estadu tinan-tinan. Tanba la iha fonte seluk ba Orsamentu Estadu, ita presiza tau matan atu Fundu Minarai bele funan babeibeik no benefisia mós jerasaun abanbairua.
Dala ida tan, PR Lú Olo husu Estadu tenki iha dadus loloos veteranu-sira nian! Kona-ba veteranu sira ne’ebé desmobilizadu ona ka sei husik loron ruma FALINTIL-FDTL, Estadu iha dever atu foti lalais sira-nia dadus no haree oinsá fó protesaun sosiál ba sira.
Ho lejislasaun ida ne’ebé fó dalan ba sira moris ho dignidade, nu’udar sivíl, ho direitu ba programas apoiu, iha ámbitu seguransa sosiál, iha área saúde, edukasaun no formasaun tékniku-profisionál.
“Iha loron-ohin, ha’u hakarak fó rekoñesimentu espesial ida ba fundador movimentu Ukun Rasik-an no Unidade Nasional, Mari Alkatiri no Ramos Horta no mós ba responsável prinsipal reorganizasaun luta, iha 1981, Xanana Gusmão,” deklara, PR Lú Olo.
Ho laran haksolok, PR Lú OLO haree Veteranus Australianus rua nulu resin lima, hosi INTERFET, ne’ebé mai TL hodi asiste selebrasaun ita-nia Loron Veteranus. Sira mai mós hodi hala’o sira-nia programa furak ida, hanaran Fanun-an iha Timor-Leste ka Timor Awakening.
Programa ne’e fó oportunidade ba veteranu australianu-sira halakon sira-nia problema mental no fó dalan atu hametin relasaun entre Veteranus Timor-Leste no Veteranus Austrália. Relasaun espesiál ida ne’e haburas dadaun ona no leno dadaun dalan ba ita haree oinsá promove turismu istóriku, tipu turismu ida ne’ebé sei tau Timor-Leste, iha mapa turistíku, ho susesu.
Ómenajen ba veteranu
Prezidenti Repúblika Francisco Guterres Lú Olo fó ómenajen ba sakrifísiu Veteranus sira hodi luta to’o ukun rasik-an, iha fatin istóriku palasio Governu, ita hakru’uk dala ida tan ba Mártir-sira ne’ebé fó kbiit, matenek no vida rasik, atu liberta ita-hothotu.
“Ita hakruuk ohin, ho domin no respeitu, ba memória hotuhotu nian, feto no mane, Tanba lista rohan-laek, ha’u temi de’it naran balun: Prezidente Nicolau Lobato, Rosa Muki, Borja da Costa, Maria Tapó, Vicente Sa’he, Maria Goretti Joaquim, Hodu Ran Kadalak, Sabalae, David Alex no Nino Konis Santana. Ho Povu no Estadu Timor-Leste nia naran, ha’u hato’o hako’ak boot ba família hothotu ne’ebé lakon ema, iha ita-nia funu naruk liu bá,” dehan, PR Lú Olo.
Xefe Estado reforsa liutan katak hosi hothotu ninia kontribuisaun, kiik ka boot, liuhosi Frente Armada, Frente Klandestina no Frente Diplomátika (Esterna), mak ita hetan Ukun Rasik-an.
“Ohin oportunidade di ‘ak atu Estadu Timor-Leste no ita ida-idak presta mós homenajen ba ita-nia belun sira, iha tasi-balun, ne’ébé simu no lakole apoia ita-nia luta Ukun Rasik-an, tinan ba tinan. Ha’ u husu maluk sira atu ita labele haluha sira ne’ebé hahú apoia kedas ita-nia luta, biar ita rasik la hatene bainhira no oinsá hetan lalais Ukun Rasik-an. Hosi lista líder no governante sira, apoiante-pioneiru ba ita-nia luta, hosi rai sira seluk,” deklara , PR Lú Olo.
Nune’e, PR Lú Olo lé sai naran heroi sira ne’ebe kontribui hodi mate iha Timor Leste Matebian Samora Machel, Prezidente FRELIMO no Prezidente Moçambique no matebian Dr Agostinho Neto , Prezidente MPLA no Prezidente Angola.
Entre sidadaun estranjeiru-apoiante-pioneiru ba ita-nia luta, ha’u hakarak temi naran ida-ida ita-nia belun Australianu ida, matebian jornalista Dennis Freney, ne’ebé organiza ligasaun Rádiu Maubere ho Darwin.
Belun ne’ e lakole hato’o informasaun, loron ka kalan, kona-ba ba ita-nia luta, iha Austrália tomak no iha rai-sira seluk.
Fó-hanoin mós katak membru rua hosi solidariedade mate hamutuk ho sidadaun timoroan, ida mak jornalista australianu Roger East ne’ebé militar indonéziu oho iha ponte kais, iha 7 Dezembru 75.
Ida seluk mak estudante hosi Malázia, Kamal Bamadaj, ne’ebé hetan tiru, iha manifestasaun 12 Novembru. Nune’e, ho ita-nia luta, iha frente tolu, nakonu ho brane no determinasaun, ho lideransa ida ne’ebé hatene mobiliza.
Organiza, kaer-metin Unidade Nasional no dada dalan ba ita-nia Povu, tinan ba tinan, hamutuk ho grupu oioin solidariedade internasionál, mak ita konsege dada atensaun internasionál no rezolve konflitu, liuhosi Referendu, ho supervizaun Nasoens Unidas nian, iha 30 Agostu 1999.
Ho mós solidariedade metin ne’e, mak forsa internasionál pás, INTERFET, lidera hosi komandante australianu Jenerál Peter Cosgrove, mai Timor-Leste, hodi restaura pás no estabilidade, iha ita-nia rai doben.
Prosesu ne’ e tomak simu apoiu hosi saudozu Kofi Annan, Sekretáriu Jeral Nasoens Unidas nian, iha tempu ne’ebá. Tinan ida ne’e ita sei selebra aniversáriu Referendu, iha 30 agostu no INTERFET, tama iha Timor-Leste, iha 20 setembru, ba dala rua nulu.
Ita hein selebrasaun boot ida, ho susesu, hosi Governu Timor-Leste. Importa selebra data istórika rua ne’e, atu rekoñese no valoriza Povu no mós hasa’e espíritu umanu ajuda malu no katak solidariedade entre ema la iha fronteira-rai ka fronteira-tasi.
Ho selebrasaun rua ne’e, jerasaun foun sei aprende liután ita-nia istória luta, nakonu ho brane no determinasaun no sira sei haforsa sira-nia identidade no orgullu, nu’udar timoroan.
Ohin data istórika ida importante tebetebes. Nune’e, PR Lú Olo hakarak fó- hanoin fila fali akontesimentu istóriku balun importante, molok ko’alia kona-ba reorganizasaun luta.
Iha fatin istóriku ida ne’e, tinan hat nulu resin haat liu bá, Komité Sentral FRETILIN, liuhosi Prezidente Francisco Xavier do Amaral, halo proklamasaun unilaterál independénsia Timor-Leste nian no hasa’e bandeira RDTL ba dahuluk, iha 28 Novembru 1975.
Maibé molok halo proklamasaun ne’e, FRETILIN kuda tiha ona fini fiar-an, ne’ebé buras tiha ona, iha Timor-Leste tomak. Joven sira, feto no mane, hamutuk ho líder no kuadrus FRETILIN nian, tun-sae foho no tesik rai tetuk, hodi hadait fiar-an, sentimentu-pertense ba rai ida de’it no hakbiit orgullu hothotu nian, nu’udar timoroan, enkuantu hanorin mós ita-nia ema lee no hakerek, oinsá tau matan ba saúde, oinsá servisu hamutuk atu hala’o sira-nia knaar ho rezultadu di’ak liu.
Biar ho kbiit-laek atu halao funu naruk no susar, Povu habelar sentimentu fiar-an no moris ho fiar koletivu katak “biar ita rai kiik ida, ita hatene katak ita bele no ita tenke manán”. Ho neon-naroman da’it hosi lideransa luta, ida ne’ebé maioria sei joven hela, ita-nia Povu hamriik duni, iha knuak hotu-hotu no hakoak-metin mehi UKUN RASIK-AN.
Tanba ne’e, biar ita-nia uma no rai sunu motuk, ema mate barak, kanek no lakon iha loron invazaun no durante okupasaun tinan rua nulu resin hat, biar hasoru hamalaha, hasoru risku tama iha kadeia no simu kastigu oioin, espíritu ukun rasik-an la mate, iha rai lulik ida ne’e.
PR Lú Olo mos kontinua fó hanoin ohin faktu istóriku balun importante ne’ebé akontese, molok reorganizasaun luta iha Marsu 1981, no tanbasá Estadu Timor-Leste hili 3 Marsu, nu’ udar Loron Veteranu sira-nian.
Tanba forsa indonézia hala’o operasaun militar maka’as tebetebes hafoin invazaun, lideransa FRETILIN la konsege halibur ho kuadrus militares, atu reorganiza kedas rezisténsia.
Maibé, liu tiha fulan lima, lideransa FRETILIN konsege hala’o duni reuniaun alargada ida ho dirijentes militares, membrus Governu RDTL no kuadrus médius. Ho orientasaun hosi lider karismátiku, Nicolau Lobato, reuniaun ne’e hatuur polítika “guerra popular, guerra prolongada no konta ho kbiit rasik”.
Rezisténsia reorganiza-an no fahe ba sektór neen, Ponta Leste, Centro-Leste, Centro-Norte, Centro-Sul, Fronteira-Sul no Fronteira -Norte. Sektór ida-idak dirije hosi Komisáriu Polítiku ida, Komandante ida no adjuntu ida ka liu.
Reuniau boot dahuluk, hodi reorganiza luta, akontese iha Soibada, hosi 15 Maiu to’o 2 Juñu 1976. Maiu 1977: Reuniaun alargada ho kuadrus médius hosi zonas libertadas, iha Laline, Viqueque.
Setembru 1978: Tropa indonézia kaptura Rádiu Maubere no hakotu úniku meiu komunikasaun FRETILIN ho rai-li’ur.
1977- 1978: Zonas libertadas hasoru ofensiva serku anikilamentu hosi tropa indonézia no ema barak mate, inkluindu dirijentes.
22 Novembru 1978: Bombardeamentu maka’as hosi aviaun harahun Baze Apoiu ikus liu, iha Foho Matebian. Ita-nia ema barak mate no kanek. Dirijente sira husik Matebian. FRETILIN rasik husu populasaun tún ba vila no kontinua luta iha ne’ebá.
31 Dezembru 1978: Prezidente FRETILIN Nicolau Lobato hetan tiru no mate, iha kampu-de-batalla, iha 31 Dezembru 1978, iha Mindelo, Turiscai.
1979: Rezisténsia tomak hasoru realidade triste ida. Hosi Komité Sentral FRETILIN nain 68, hela de’it ona nain hitu iha rai li’ ur no sobrevivente na’in tolu iha rai-laran: Xanana Gusmão, Ma’Huno Bulerek Karataiano no Fernando Txai. Maibé, tanba brane nafatin, sira hahú buka asu’ain sira seluk, hodi organiza fila fali luta libertasaun nasional.
10 Junho 1980: ita-nia asu’uain sira ataka paiol kuartel Batalhaun 745 iha Bekora,Dili no postu emisór, iha Marabia. Notísia kona-ba atake, biar la fó rezultadu boot, fó sinal katak Rezisténsia seidauk mate.
To’o 8 Marsu 1981: Primeira Konferénsia Nasional hala’o iha Maubai. Iha de’it ona sobrevivente-CCF rua, Xanana Gusmão no Ma’Huno, ho orientasaun hosi Xanana Gusmão, Konferénsia FRETILIN deside, iha loron 3 Marsu 1981, FRETILIN nakfila hosi Frente ba partidu.
Harii Consello Revolucionário da Resistência Nacional – CRRN nu’ udar órgaun koletivu Rezisténsia nian, Eleje kuadrus nain sia tan ba CCF no Xanana Gusmão, nu’udar Komisáriu Polítiku Nasional FRETILN Xanana Gusmão hahú kaer kargu nu’ udar Komandante-em-Xefe FALINTIL.
Luta reorganiza ho rejiaun militar tolu, Funu Sei Nafatim, iha parte leste, Nakroman, iha Sentru, no Haksolok, iha parte Oeste. Rejiaun ida-idak iha Komisáriu Polítiku ida no Sekretáriu Responsável.
Tanba Primeira Konferénsia Nasional ne’e hala’o iha tempu ida ne’ebé maioria lideransa mate tiha ona no tempu hamlaha no ho susar oioin, halibur boot ida ne’e hatudu duni brane no determinasaun hosi líder-sobrevivente FRETILIN nain rua.
Atu lori nafatin ba oin mehi ukun rasik-an, biar hasoru risku mate no terus oioin.
Iha 3 Marsu mak Konferensista sira foti desizaun importante hodi reorganiza luta ita nível nasional. Nune’e, Estadu Timor-Leste konsagra ona, loron 3 Marsu, liuhosi Lei n°3/2016, nu’ udar Loron Veteranus sira-nian.
Tuir ita-nia lei-sira, lia fuan veteranu refere de’it ba sira ne’ebé partisipa iha luta libertasaun nasional, pelumenus, tinan sanulu resin lima, liuhosi estrutura ka organizasaun rezisténsia ruma, entre 20 Agostu 1975 no 25 Outubru 1999.
Maibé, Lei n°3/2016 hatete mós katak, iha loron-ohin, Estadu presta homenájen, ba sidadaun timoroan hothotu ne’ebé partisipa iha frente armada, frente klandestina no frente diplomátika esterna, iha ita-nia luta hasoru okupasaun indonézia. Eus

Lee hotu :   Trabalhador 619 tuir teste nani tasi

Add to Comments Here!!!!

error: Content is protected.
Secured By miniOrange
You might also like:
DIA 03/03/19 || GMNTV LIVE STREAM || JORNAL NASIONAL KALAN

DIA 03/03/19 || GMNTV LIVE STREAM || JORNAL AS 12

DIA 02/03/19 || GMNTV LIVE STREAM || JORNAL NASIONAL KALAN

Close