Udan boot iha Domingu madrugada, Rezulta eletrisidade soke mate komunidade ida

Komunidade ida  ho naran Joel Sebastião Sanusi Sarmento,   eletrisidade soke mate tanba impaktu udan boot  iha  Domingu (17/03/19) madrugada oras Timor-Leste.

Joel Sebastião Sanusi Sarmento,   mate ho idade mais ou menus tinan  36 hodi husik hela nia  fen no oan mane nain ida.  Enkuantu matebian durante ne’e ho nia fen hela  iha Aldeia 01 Suku Lahane Osidental Postu Administrativu Verra-Cruz Munisípiu Díli.  Servisu nudar   funsionariu iha Embaisada Estadus Unidus Amerika  iha Díli.

Segundu Komandante PNTL Munisípiu Díli Superintendente Assistente Euclides Belo haktuir,  motivu akontesementu ne’e katak, antes vitima  Joel Sebastião Sanusi Sarmento konsege salva nia fen ho oan  husi inundasaun.

Hafoin ne’e  vítima tama hikas uma  laran atu losu fiu jelera,   maibe tanba fiu kanek  hodi soke vitima Joel Sebastião Sanusi Sarmento,  mate iha fatin no  familia labele foti sai vitima, tanba  eletrisidade moris hela.

“Depois servisu eletresidade  hamate ahi, foin komunidade bolu Ambulansia, Bombeiros no patrulha Eskuadra Verra-Cruz  hodi  tula ba ambulansia  ba Hospital Nasional Guido Valadares (HNGV) no mate isin agora dadauk  iha Lahane Osidental  hodi submete  ba prosesu funebre,  ne’e mak relatoriu ne’ebé mak ha’u simu”, Segundu Komandante PNTL Munisípiu Díli Superintendente Assistente Euclides Belo.

Iha Segunda (18/03/19), familia sira lori  ona matebian Joel Sebastião Sanusi Sarmento ba halo iha simiteriu Becussi.avi